قازاقستاندا مينيسترلەردىڭ جالاقىسى 1,7 ميلليون تەڭگەگە دەيىن جەتەدى، دەپ حابارلايدى “ادىرنا” ۇلتتىق پورتالى Kursiv.media سايتىنا سىلتەمە جاساپ.
2022 جىلدىڭ شىلدەسى بويىنشا قازاقستاندا 18 مينيستر بار. جاقىندا ءبىلىم جانە عىلىم مينيسترلىگى وقۋ-اعارتۋ جانە جوعارعى عىلىم بولىپ ەكى ۆەدومستۆوعا بولىنگەن. الايدا باسىلىمنىڭ ساۋالىنا تەك 10 مينيسترلىك جاۋاپ بەرگەن. دەگەنمەن سىرتقى ىستەر، قورعانىس، ادىلەت، ەڭبەك، ءبىلىم جانە عىلىم، مادەنيەت، ۇلتتىق ەكونوميكا، ەكولوگيا جانە دەنساۋلىق ساقتاۋ مينيسترلىكتەرى تۋرا جاۋاپ بەرۋدەن باس تارتقان. تەك باس پروكۋراتۋرانىڭ ارالاسۋىنان كەيىن ەكولوگيا مەن دەنساۋلىق ساقتاۋ مينيسترلىكتەرى جاۋاپتارىن وزگەرتكەن.
انىقتالعانداي، مينيسترلىك باسشىلارى 1-1,7 ميلليون تەڭگە ارالىعىندا جالاقى الادى.
جالاقىسى ەڭ تومەن مينيسترلەر ىشىندە اۋىل شارۋاشىلىعى ءمينيسترى ەربول قاراشوكەەۆ بار. قىزمەت ەتكەن جىلدارى مەن ۇستاپ قالاتىن الىمداردى ەسەپتەگەندە اي سايىن شامامەن 1 ميلليون تەڭگە الادى.
2020 جىلى قىزمەتكە كەلگەن توتەنشە جاعدايلار ءمينيسترى يۋري ءيليننىڭ دە جالاقىسى 1 ميلليون تەڭگە شاماسىندا. جالاقىعا گەنەرال-لەيتينات شەنى دە ەسەپكە الىنادى.
ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆتىڭ جالاقىسى ەڭبەك ءوتىلى، زاڭدىق نەگىزدە الىناتىن سالىقتاردى ەسەپتەگەندە 1,3 ميلليون تەڭگەگە تەڭ. برەكەشەۆ 2021 جىلدىڭ 10 قىركۇيەگىندە مينيستر بولىپ تاعايىندالدى.
قارجى ءمينيسترى ەرۇلان جاماۋباەۆتىڭ جالاقىسى پرەمەر-ءمينيستردىڭ ورىنباسارى مىندەتىن اتقارعانىن قوسا ەسەپتەگەندە 1,5 ميلليون تەڭگە شاماسىندا.
اقپارات جانە قوعامدىق دامۋ ءمينيسترى اسقار وماروۆتىڭ جالاقىسى 1 564 849 تەڭگە.
دەنساۋلىق ساقتاۋ مينيسترلىگىندە ورتالىق مەمورگان باسشىلارىنىڭ جالاقىسى ەڭبەك وتىلىنە قاراي 1 372 601 مەن 1 668 958 تەڭگە ارالىعىندا ەكەنىن مالىمدەدى. اجار عينياتتىڭ ەڭبەك ءوتىلى 25 جىل، سايكەسىنشە ول ماكسيمالدى 1,6 ميلليون تەڭگە جالاقى الادى. ول بۇل لاۋازىمعا 2022 جىلدىڭ 11 قاڭتارىندا تاعايىندالعان.
ىشكى ىستەر ءمينيسترى مارات احمەتجانوۆتىڭ 20 جىل ەڭبەك ءوتىلىن ەسەپتەگەندە 1 668 958 تەڭگە جالاقى الادى. ونىڭ ىشىندە شەنى ءۇشىن قوسىمشا تولەنەتىن 96 218,59 تەڭگە بار.
يندۋستريا جانە ينفراقۇرىلىمدىق دامۋ ءمينيسترىنىڭ مەملەكەتتىك قىزمەتتەگى ەڭبەك ءوتىلى 30 جىلدان اسادى. سايكەسىنشە ول دا 1 668 958 تەڭگە جالاقى الادى. وسكەنباەۆ مينيستر بولىپ 2022 جىلدىڭ 11 قاڭتارىندا تاعايىندالدى.
ساۋدا جانە ينتەگراتسيا مينيسترلىگىن باسقاراتىن باقىت سۇلتانوۆ تا 1 668 958 تەڭگە الادى.
ەنەرگەتيكا ءمينيسترى بولات اقشولاقوۆتىڭ جالاقىسى 1 668 958 تەڭگە. ەڭبەك جولىن 1994 جىلى باستاعان اقشولاقوۆ بۇل لاۋازىمعا 2022 جىلدىڭ 11 قاڭتارىندا كەلدى.
