داۋدىڭ باسى – تەمەنوۆتىڭ پوۆەسى. ايگىلى «ماحاببات بەكەتى» ءفيلمى تەمەنوۆتىڭ «گۇلناز» پوۆەسى جەلىسىمەن تۇسىرىلگەنىن ەسكەرسەك، ءفيلمنىڭ جالعاسىن تۇسىرمەكشى بولىپ جۇرگەن الاگوزوۆا تەمەنوۆتەن رۇقسات سۇراماي، بۇل ىسكە بەلسەنە كىرىسىپتى. اتىشۋلى پروديۋسەردىڭ ايتۋىنشا، ءفيلمنىڭ اۆتورلىق قۇقىعى «قازاقفيلمگە» تيەسىلى جانە ول مادەنيەت مينيسترلىگىنەن ءتيىستى رۇقسات تا الىپ ۇلگەرگەن ەكەن.
وسى ماسەلەگە قاتىستى تانىمال جۋرناليست بيبىگۇل داۋلەتبەكقىزى دا پىكىر ءبىلدىرىپ، رەجيسسەر تالعات تەمەنوۆتىڭ «ماحاببات بەكەتى» ءفيلمى بولماسا، بايان الاگوزوۆانى بۇگىندە ەشكىم تانىمايتىنىن ايتتى. بۇل تۋرالى ول ءوزىنىڭ جەلىدەگى پاراقشاسىنا جازدى، – دەپ حابارلايدى "قازاق ءۇنى" گازەتى
– بايان – بۇرىنعى ەسەنتاەۆا، قازىرگى الاگوزوۆا اپكەمىز تالعات تەمەنوۆتىڭ كەزىندە حالىقتىڭ ءولىپ-ءوشىپ جاقسى كورگەن «ماحاببات بەكەتىنىڭ» 2 ءبولىمىن ءتۇسىرىپ جاتىر ەكەن. تاعى كەلىپ رۇقساتىن الماعان كورىنەدى. ول ول ما، كەيىپكەرلەردىڭ اتى گۇلناز بەن ورال. ماسساعان، بەزگەلدەك! تالعات اعامىز شىرىلداپ: «بۇل مەنىڭ جازعان «گۇلناز» دەگەن پوۆەستىم عوي. ال، «ماحاببات بەكەتى» مەنىڭ اۆتورلىق ءفيلمىم. يدەياسىنا دەيىن كوشىرىپ العانى بىلاي تۇرسىن، اۋەنىن دە العان» دەپ قىنجىلا ايتادى. ال، وعان بايانكا اپكەمىز بەتى بۇلك ەتپەي: «مادەنيەت مينيسترىنەن رۇقسات الدىم» دەپ قويادى، – دەپ جازدى جۋرناليست.
داۋلەتبەكقىزىنىڭ پىكىرىنشە، ينتەللەكتۋالدى ۇرلىق جاساۋ – ناعىز قىلمىس.
– «گۇلناز» پوۆەستىن جازعان بەلگىلى رەجيسسەر تالعات تەمەنوۆ كوكەمىز. ول كىسىنى الەم تانيدى. سىيلايدى. باس يەدى. وسى پوۆەست بويىنشا تۇسىرىلگەن «ماحاببات بەكەتى» ءفيلمىنىڭ رەجيسسەرى دە تالعات تەمەنوۆ. الدە بىلتىر عانا وسى ايەلدىڭ تاريحي سەريالىمىز «قوزى كورپەش – بايان سۇلۋدى» ىرىم-جىرىمىن شىعارعانىنان حابارسىزسىز با؟ ءتۇسىرسىن «كوروۆاسىن» وندا شارۋامىز شامالى (ول دا كارىستەردەن ۇرلانعان دۇنيە…), – دەيدى تەلەجۇرگىزۋشى.
– ەگەر تالعات تەمەنوۆ بولماسا، باياندى بۇگىن قازاق حالقى تانىماس ەدى. باياندى بايان ەتكەن – گۇلناز. ال «گۇلناز»-ءدى پوۆەست ەتىپ جازىپ، ءفيلمنىڭ يدەياسىنا دەيىن ويلاپ شىعارعان – تالعات تەمەنوۆ. ميلليونداعان كورەرمەن سول فيلم ءۇشىن دە باياننىڭ نەبىر حيكايالارىن كەشىرىپ كەلەدى. ال، يدەيا ۇرلاعان ادامدى ومىردە جەك كورەمىن. قارسىمىن! سوندىقتان دا، بۇل جولى تالعات اعامىز جاعىندامىن، – دەپ سانايدى داۋلەتبەكقىزى. qazaquni.kz. وسىلاي دەپ جازادى.
ءبىز بۇل ماقالانى جاريالاي وتىرىپ، اسىقپايىق دەگىمىز كەلەدى. بۇل ماسەلە ءالى دە جالعاسىن تابار دەگەن ويدامىز. سەبەبى، الەمدە جولى بولعان فيلم تۋىندىنسىنىڭ جالعاسىن ءتۇسىرۋ كەڭىنەن ەتەك العان جاعداي. باسقا ەلدەردە بۇنداي ءۇردىستىڭ باياعىدان كەڭ ەتەك جايۋى، بىرىنشىدەن جاقسى يدەيا تابۋ ءۇشىن كىم دە بولسا كەرەمەت دارىن يەسى بولۋى شارت. ەكىنشىدەن بۇلاي ەتۋ اتاقتى بولۋدىڭ ەڭ قىسقا جولدارىنىڭ ءبىرى. بىراق، بۇل جولدىڭ ءبىر بىراعى بار. ەگەر فيلم ناشار بولسا ءومىر بويى جيناعان اتىڭا وشپەس كىر كەلتىرەسىڭ.
ەگەر بايان الاگوزوۆا اۆتورلىق قۇقىق "قازاقفيلمگە" تيەسىلى دەسە، جانە ول راس بولسا، وندا اڭگىمە شىنىندا شيەلەنىسە تۇسپەك. رەجيسسەر تالعات تەمەنوۆتىڭ ءوز فيلمىنە اۆتورلىق قۇقىعى بار ما؟ بۇل سۇراقتىڭ جاۋابى قانداي بولماق؟ كۇتەيىك، قانشاما "داۋدىڭ باسى دايرابايدىڭ الا سيىرىنان" باستالدى دەگەن دەي، اقىرىن كۇتەيىك.
ەڭ باستى سۇراق ءفيلمىنىڭ جالعاسى ءالى كۇنگە دەيىن كوپشىلىك ءسۇيىپ كورەتىن "ماحاببات بەكەتى" ءفيلمىنىڭ كوركەمدىك دەڭگەيىندە تۇسىرىلە مە؟ ەڭ باستى سۇراق وسى.
"ادىرنا" ۇلتتىق پورتالى
