قازاقستان بيلىگى يتاليالىق Eni مەن بريتاندىق Shell باسشىلىق ەتەتىن سەرىكتەستىكپەن قاراشىعاناق كەن ورنىندا گاز وڭدەۋ زاۋىتىن سالۋدان باس تارتتى، دەپ حابارلايدى "ادىرنا" ۇلتتىق پورتالى.
بۇل تۋرالى قر ەنەرگەتيكا مينيسترلىگىنىڭ ءباسپاسوز قىزمەتى مالىمدەدى.
«قازاقستان كەلىسسوزدەردىڭ قورىتىندىسى بويىنشا اكتسيونەرلەر قويعان شارتتاردى ەكونوميكالىق تۇرعىدان قولايسىز دەپ تانىدى. بۇل شارتتاردىڭ ىشىندە قاراشىعاناقتاعى گاز وڭدەۋ زاۋىتى قۇرىلىسىنىڭ 100% شىعىنىن وتەۋدەن بولەك، قوسىمشا 1 ميلليارد دوللار تولەۋ تالابى دا بولدى»، – دەلىنگەن حابارلامادا.
اكتسيونەرلەر مۇنداي تالاپتىڭ سەبەبىن زاۋىت قۇرىلىس شىعىندارىن 3–4 جىل ىشىندە اقتاپ شىعارۋ مۇمكىن ەمەس ەكەندىگىمەن تۇسىندىرگەن. سەبەبى، ءونىمدى ءبولىسۋ تۋرالى كەلىسىمنىڭ مەرزىمى 2033 جىلى اياقتالادى.
سونداي-اق، ينۆەستورلار تاراپىنان قازاقستانمەن كىرىستى نەگىزسىز الىپ تاستاۋ بويىنشا ءجۇرىپ جاتقان اربيتراجدىق داۋلاردى تولىق توقتاتۋ تالابى دا قويىلعان.
«وسىعان بايلانىستى قاراشىعاناق گاز وڭدەۋ زاۋىتى جوباسىنا قاتىستى كەلىسسوزدەر، ءونىمدى ءبولۋ تۋرالى قاراشىعاناق جوباسى اياسىندا باستالعانىمەن، قازىرگى ۋاقىتتا اياقتالدى. دەگەنمەن، قاراشىعاناق كەن ورنىنىڭ گاز الەۋەتى ءالى دە زەرتتەلىپ جاتىر»، – دەپ ناقتىلادى ەنەرگەتيكا مينيسترلىگى.
بۇعان دەيىن Bloomberg اگەنتتىگى قازاقستان بيلىگىنىڭ بۇل جوبانى «سامۇرىق-قازىنا» ۇلتتىق قورىنىڭ ەنشىلەس كومپانياسى «قازمۇنايگازعا» بەرۋ مۇمكىندىگىن قاراستىرىپ جاتقانىن حابارلاعان بولاتىن.
قاراشىعاناق مۇناي-گاز كوندەنسات كەن ورنى باتىس قازاقستاندا، 280 شارشى شاقىرىمنان استام اۋماقتا ورنالاسقان جانە الەمدەگى ەڭ ءىرى كەن ورىندارىنىڭ ءبىرى سانالادى. ول 1997 جىلى 18 قاراشادا قازاقستانمەن جاسالعان ءونىمدى ءبولىسۋ تۋرالى كەلىسىم اياسىندا حالىقارالىق كونسورتسيۋم تاراپىنان يگەرىلىپ كەلەدى.
قاراشىعاناق جوباسىنىڭ وپەراتورلارى - Royal Dutch Shell مەن Eni كومپانيالارى، ارقايسىسىنىڭ ۇلەسى – 29,25%. سونىمەن قاتار، Chevron (18%), لۋكويل (13,5%) جانە قازمۇنايگاز (10%) جوبادا ۇلەسكە يە.
قازىر كەن ورنىندا وندىرىلگەن گازدىڭ كوپ بولىگى قايتادان جەر قويناۋىنا ايدالادى، ال قالعانى رەسەيدىڭ ورىنبور گاز وڭدەۋ زاۋىتىنا جىبەرىلەدى، سەبەبى قاراشىعاناقتا ءوز گاز وڭدەۋ ينفراقۇرىلىمى جوق. بۇل زاۋىتتى سالۋ تۋرالى ماسەلە 2000-جىلداردان بەرى كوتەرىلىپ كەلەدى.
