ەلىمىزدە جىل باسىنان بەرى مۇناي مەن گاز ءوندىرۋ كولەمىن شامامەن 20%-عا قىسقارعان. بۇل تۋرالى ۇكىمەت وتىرىسىندا ەنەرگەتيكا ءمينيسترى ەرلان اقكەنجەنوۆ مالىمدەدى، دەپ حابارلايدى «ادىرنا» ءتىلشىسى.
ايتۋىنشا، ەسەپتى كەزەڭدەگى مۇناي جانە گاز كوندەنساتىن ءوندىرۋ كولەمى 19,7 ملن توننا نەمەسە وتكەن جىلدىڭ سايكەس كەزەڭىمەن سالىستىرعاندا 80,2%-دى قۇراعان.
«قاراشىعاناقتا شيكى گازدى كەرى ايداۋدىڭ 6-شى كومپرەسسورىن ىسكە قوسۋ جۇمىستارى جالعاستىرىلۋدا: ىسكە قوسىلۋ بيىلعى ءىى توقسانعا جوسپارلانعان. بۇل مۇناي ءوندىرىسىن 10-11 ملن توننا دەڭگەيىندە ۇستاپ تۇرۋدى قامتاماسىز ەتەدى. سونداي-اق ءىرى جەر قويناۋىن پايدالانۋشىلارمەن مۇناي ءوندىرىسىن ارتتىرۋ شارالارى تۋرالى كەلىسسوزدەر جۇرگىزىلۋدە. بيىلعى 3 ايدىڭ قورىتىندىسى بويىنشا – مۇناي ەكسپورتتاۋ كولەمى 15,3 ملن توننا نەمەسە وتكەن جىلدىڭ سايكەس كەزەڭىمەن سالىستىرعاندا 78,5%-عا ورىندالدى. 2026 جىلعا بولجام – 76 ملن توننا», — دەپ ءتۇسىندىردى سپيكەر.
كقك ارقىلى قازاقستان مۇنايىنىڭ نەگىزگى بولىگى الەمدىك نارىقتارعا ەكسپورتتالادى. كونسورتسيۋمنىڭ رەسەي اۋماعىنداعى نىساندارى وتكەن جىلى بىرنەشە رەت ۋكراين دروندارىنىڭ شابۋىلىنا ۇشىراعان. قاراشا ايىندا كقك-داعى تەڭىزدەگى جۇك تيەۋ قۇرىلعىلارىنا شابۋىل جاسالسا، قاڭتار ايىندا قازاقستان مۇنايىن تاسىمالداۋعا جالعا الىنعان تانكەرلەرگە سوققى جاسالعان.
ەنەرگەتيكا مينيسترلىگى بۇعان دەيىن كاسپي قۇبىر كونسورتسيۋمىنا جاسالعان شابۋىلدار ەلدەگى مۇناي ءوندىرۋ كولەمىنىڭ 480 مىڭ تونناعا ازايۋىنا اكەلگەنىن حابارلاعان. قازىرگى ۋاقىتتا بيلىك مۇناي ەكسپورتىن ءارتاراپتاندىرۋ جانە ءوندىرۋ كولەمىن قىسقارتپاۋ ءۇشىن بالاما باعىتتاردى بەلسەندى تۇردە قاراستىرۋدا.
