بەلگىلى قازاقستاندىق ساۋلەتشى، ديزاينەر جانە ساۋلەت تاريحىن زەرتتەۋشى الماس بايمۇحانۇلى ورداباەۆ 88 جاسىندا ومىردەن ءوتتى. قارالى حاباردى ونىڭ جۇبايى ولگا داۋگاليەۆا جەتكىزدى، دەپ ابارلايدى "ادىرنا".
«بۇگىن مەنىڭ اكەم، الماس ورداباەۆ ومىردەن ءوتتى. ول مەن ءۇشىن قالاي ءومىر ءسۇرۋدىڭ دە، قالاي بۇل دۇنيەمەن قوشتاسۋدىڭ دا ۇلگىسى بولىپ قالدى.
وتكەن كۇنى جارى ولگاعا قوشتاساتىنىن ايتىپ، سوڭعى سالعان كارتينالارىنا قولتاڭباسىن قويدى. كەشە مەنىمەن قوشتاستى. بۇگىن پراگاداعى نەمەرەلەرىمەن قاشىقتان قوشتاسىپ، ولارعا قول بۇلعاپ، سوڭعى رەت امانداستى. جىميىپ تۇرىپ، ءبارىمىزدى جاقسى كورەتىنىن ايتتى.
ارادا جارتى ساعات وتكەندە اكەمنىڭ جۇرەگى توقتادى»، دەپ جازدى قىزى ءجاميلا ستەحليكوۆا.
الماس ورداباەۆ 1959 جىلى لەنينگراد ينجەنەرلىك-قۇرىلىس ينستيتۋتىنىڭ ساۋلەت فاكۋلتەتىن، ال 1962 جىلى قازاق پوليتەحنيكالىق ينستيتۋتىنىڭ ونەركاسىپتىك جانە ازاماتتىق قۇرىلىس فاكۋلتەتىن تامامداعان. ەڭبەك جولىن 1960-جىلداردىڭ باسىندا بەلگىلى ساۋلەتشى نيكولاي ريپينسكيدىڭ جەتەكشىلىگىمەن «قازقالاقۇرىلىسجوبا» ينستيتۋتىندا باستاعان.
1975–1976 جىلدارى قازاق كسر مادەنيەت مينيسترلىگىنىڭ بەينەلەۋ ونەرى جانە تاريحي ەسكەرتكىشتەردى قورعاۋ ءبولىمىن باسقاردى. وسى كەزەڭدە ول الماتىداعى ۆوزنەسەنسك كافەدرالدى سوبورى مەن تۇركىستانداعى قوجا احمەت ياساۋي كەسەنەسىن قالپىنا كەلتىرۋ جۇمىستارىنا قاتىسقان. كەيىن بۇل جوبالار تۋرالى ەستەلىكتەرىن «ۆلاست» رەداكتسياسىنا بەرگەن بەينەدارىستەرىندە بايانداعان.
1980-جىلدارى الماتىداعى «سامال» ىقشاماۋدانىن جوبالاۋ جۇمىستارىنا اتسالىستى.
الماس ورداباەۆ ۇزاق جىلدار بويى ۇستازدىق قىزمەتپەن اينالىستى. قازاق پوليتەحنيكالىق ينستيتۋتىنىڭ ساۋلەت كافەدراسىندا ءدارىس وقىپ، فيلوسوفيا كافەدرالارىندا مادەنيەتتانۋ پانىنەن ساباق بەردى. سونداي-اق كاسپي ۋنيۆەرسيتەتىنىڭ ساۋلەت جانە ديزاين كافەدراسىنىڭ پروفەسسورى بولدى.
