92 جاسقا قاراعان شاعىندا فرانتسۋز اكتريساسى بريجيت باردو دۇنيەدەن وزدى. قايعىلى حاباردى فرانتسۋز بۇقارالىق اقپارات قۇرالدارى جازدى، دەپ حابارلايدى "ادىرنا".
L’Humanité گازەتىنىڭ مالىمەتىنشە، ايگىلى اكتريسا فرانتسيانىڭ جەرورتا تەڭىزى جاعالاۋىنداعى ءىرى قالاسى — تۋلوندا كوز جۇمعان. قاراشا ايىندا باق ونىڭ وسى قالاداعى جەكەمەنشىك كلينيكالاردىڭ بىرىنە جاتىپ، وپەراتسيا جاسالعانىن حابارلاعان بولاتىن.
بريجيت باردو — فرانتسۋز اكتريساسى، ءانشى، مودەل، جانۋارلار قۇقىعىن قورعاۋشى بەلسەندى، 1950–1960 جىلدارداعى ستيل يكوناسى.
ول 15 جاسىندا Elle جۋرنالىنىڭ مۇقاباسىنا شىعىپ، 18 جاسىندا كينو سالاسىندا دەبيۋت جاسادى. ال الەمدىك داڭق وعان رەجيسسەر روجە ءۆاديمنىڭ «قۇداي… ايەلدى جاراتتى» (1956) فيلمىندەگى ءرولى ارقىلى كەلدى. بۇل تۋىندىداعى ەركىن ءارى سەزىمتال ايەل بەينەسى كورەرمەندەردى تاڭعالدىردى ءارى ءتانتى ەتتى.
بريجيت باردو شامامەن 50-گە جۋىق فيلمگە تۇسكەن. ولاردىڭ قاتارىندا «اقيقات» (1960), «مەنسىنبەۋ» (1963) جانە «ۆيۆا ماريا!» (1965) كارتينالارى بار.
1973 جىلى، 39 جاسىندا، ول اكتەرلىك مانسابىن اياقتاپ، ءومىرىن جانۋارلاردى قورعاۋ ىسىنە ارنادى. 1986 جىلى بريجيت باردو قورىن قۇرىپ، يتبالىقتاردى اۋلاۋعا جانە جانۋارلارعا قاتىگەزدىك كورسەتۋگە قارسى كۇرەستى.
2021 جىلدىڭ جەلتوقسانىندا باردو قازاقستان پرەزيدەنتى قاسىم-جومارت توقاەۆقا حات جازىپ، جانۋارلاردى قورعاۋ تۋرالى زاڭ جوباسىنداعى ءبىر باپتى الىپ تاستاۋدى سۇراعان.
ال 2019 جىلدىڭ جەلتوقسانىندا اكتريسا قازاقستانداعى جانۋارلارعا جاسالىپ جاتقان قاتىگەزدىككە قاتىستى پرەزيدەنتكە شاعىم جولداعان بولاتىن. سول كەزدە قاسىم-جومارت توقاەۆ اكتريساعا جاۋاپ بەرىپ، مەملەكەتتىڭ بۇل ماسەلەگە نازار اۋدارىپ، ءوزىن مەيىرىمدى ۇلت رەتىندە كورسەتۋى كەرەكتىگىن، تەك بالالاردى عانا ەمەس، جانۋارلاردى دا قورعاۋ ماڭىزدى ەكەنىن اتاپ وتكەن.
