اتىراۋدا بۇرىنعى تانىسى قارىزىن سۇراۋعا بارعان ازاماتتى بالا-شاعاسىنىڭ كوزىنشە اياۋسىز ۇرىپ-سوققان، دەپ حابارلايدى "ادىرنا" ۇلتتىق پورتالى.
جەرگىلىكتى باق مالىمەتىنشە، جابىرلەنۋشىنىڭ جۇبايى انارگۇل مۋعزاروۆا جولداسى رۋسلان جولماعانبەتوۆتىڭ ءومىر مەن ءولىم اراسىندا جاتقانىن ايتىپ، اۋرۋحانا الدىندا كوز جاسىنا ەرىك بەردى. ونىڭ ايتۋىنشا، كۇيەۋىنىڭ بۇرىنعى ارىپتەسى دوسىن سوققىعا جىققان. ول بىرنەشە اي بويى 30 مىڭ تەڭگە قارىزىن قايتارماي جۇرگەن.
«اياۋسىز ۇرىپ تاستادى، بالا-شاعاسىنىڭ كوزىنشە. قاتتى كۇيزەلىپ، بالالارىمدى ماشيناعا وتىرعىزا الماي قالدىم. ۇلكەن قىزىم مەن كىشى ۇلىم شوشىپ قالدى. اكەلەرىن سول جەردە تاستاپ كەتتى»، – دەدى جابىرلەنۋشىنىڭ ايەلى.
ناۋقاسقا شۇعىل تۇردە وتا جاسالدى. دارىگەرلەردىڭ ايتۋىنشا، ونىڭ جاعدايى وتە اۋىر.
«ناۋقاس اۋىر جاعدايدا جەتكىزىلدى. وڭەش جاراقاتى، مەدياستينيت دياگنوزى قويىلدى. وتا جاسالدى، قازىر اپپارات ارقىلى دەمالىپ جاتىر»، – دەيدى اتىراۋ وبلىستىق اۋرۋحاناسىنىڭ انەستەزيولوگ-رەانيماتولوگى.
جابىرلەنۋشىنىڭ تۋىستارى قاتىگەزدىك تانىتقان كۇدىكتىنىڭ ءالى قاماۋعا الىنباعانىنا نارازى. ولار ءتىپتى كەشىرىم دە سۇراماعانىن ايتىپ وتىر.
پوليتسيا وكىلدەرىنىڭ مالىمدەۋىنشە، 85 جىلى تۋعان ازاماتقا قاتىستى قىلمىستىق ءىس تىركەلگەن، تەرگەۋ ءجۇرىپ جاتىر.
