التاي رەسپۋبليكاسىنىڭ استاناسى تاۋلى التاي قالاسىندا ءوزىن-ءوزى باسقارۋدىڭ ەكى دەڭگەيلى جۇيەسىن جويۋعا قارسى رۇقسات ەتىلگەن ميتينگ ءوتتى، دەپ حابارلايدى “ادىرنا” ۇلتتىق پورتالى.
نارازىلىق شەرۋىنە قاتىسۋشى، بەلسەندى پاۆەل پاستۋحوۆتىڭ ايتۋىنشا، نارازىلىق شاراسىنا شامامەن 3800–4000 ادام قاتىسقان. قوعامدىق ءتارتىپ بۇزىلماعان.
ميتينگكە قاتىسۋشىلاردىڭ كەيبىرى ۇلتتىق كيىممەن كەلىپ، قولدارىنا پلاكاتتار ۇستاپ شىققان. وندا: ء«بىزدىڭ التايىمىزدان قولىڭدى تارت»، «جەرىمىزدى وليگارحتاردان قورعايمىز»، «تۋرچاك وتستاۆكاعا كەتسىن» دەگەن جازۋلار بولعان.
نارازىلار بيلىكتىڭ ەكى دەڭگەيلى جەرگىلىكتى باسقارۋ جۇيەسىن (اۋىلدىق جانە اۋداندىق) جويىپ، ولاردى ءبىر ورتالىقتان باسقارىلاتىن وكرۋگتەرگە بىرىكتىرۋ جوسپارىنا قارسى. بۇل جوسپارعا سايكەس، اۋىلدىق كەڭەستەر تاراتىلىپ، وكرۋگ اكىمدەرىن تىكەلەي سايلاۋ مۇمكىندىگى قاراستىرىلعان.
سونداي-اق، جۇرتشىلىق رەسپۋبليكا ۇكىمەتىنىڭ باسشىسى بولىپ ەكس-دەپۋتات، «ەۆالار» كومپانياسىن نەگىزىن قالاعان كاسىپكەردىڭ ۇلى الەكساندر پروكوپەۆتىڭ تاعايىندالۋىنا قارسى ەكەنىن ءبىلدىردى.
بەلسەندىلەر ميتينگ كەزىندە ءموبيلدى ينتەرنەتتىڭ ناشارلاعانىن ايتىپ شاعىمداندى. بۇعان دەيىن، 12 ماۋسىمدا دا نارازىلىق بىلدىرۋشىلەر فەدەرالدى تاس جولدى ۋاقىتشا جاۋىپ، وسى رەفورماعا قارسىلىق بىلدىرگەن بولاتىن.
التاي رەسپۋبليكاسىنىڭ باسشىسى اندرەي تۋرچاك بۇل جاعدايعا تۇسىنىكتەمە بەرگەن جوق. الايدا بۇعان دەيىن ول نارازىلىققا شىققانداردى «ۆاندالدار» دەپ اتاپ، سىناعان بولاتىن.
رەسەي زاڭناماسىنا سايكەس، ءار ءوڭىر جەرگىلىكتى ءوزىن-ءوزى باسقارۋ جۇيەسىن ساقتاۋ نەمەسە وزگەرتۋ جونىندە شەشىمدى دەربەس قابىلدايدى.
