27 ماۋسىم كۇنى ەرەۆاندا وتكەن ءباسپاسوز ءماسليحاتىندا يراننىڭ ارمەنياداعى ەلشىسى مەحدي سوبحاني يرانعا قارسى كەز كەلگەن قاۋىپكە تەگەراننىڭ قاتاڭ جاۋاپ بەرۋگە دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى News.am سايتىنا سىلتەمە جاساپ.
«الەم يرانمەن كۇش كورسەتۋ تىلىمەن سويلەسۋگە بولمايتىنىن ءتۇسىندى. يران مەن يران حالقىنا قاۋىپ توندىرۋگە جول جوق. ءبىز ولۋگە دايىنبىز، بىراق ەشقاشان قىسىم مەن قورقىتۋعا كونبەيمىز. اگرەسسوردى شابۋىلدى توقتاتۋعا ماجبۇرلەدىك جانە يران حالقىنىڭ ەركىن ءارى قاراي دا مويىنداتۋعا دايىنبىز»، – دەدى ول.
ازەربايجان اۋماعى يرانعا قارسى دروندىق شابۋىلداردا پايدالانىلدى دەگەن بولجامدارعا قاتىستى ەلشى يراننىڭ بۇل جونىندە ناقتى بارلاۋ مالىمەتتەرىنە يە ەكەنىن ايتتى. ونىڭ سوزىنشە، يران اۋماعىنا كورشىلەس ەلدەردەن بىرقاتار ۇشقىشسىز ۇشۋ اپپاراتتارى كىرگەن.
«وسى سەبەپتى يران پرەزيدەنتى مەن ازەربايجان پرەزيدەنتى اراسىنداعى تەلەفون ارقىلى سويلەسۋدە ءبىزدىڭ پرەزيدەنت مىرزا بۇل ماسەلەگە بايلانىستى تەرگەۋ جۇرگىزۋدى سۇرادى. ەندى ءبىز سول تەرگەۋدىڭ ناتيجەلەرىن كۇتىپ وتىرمىز»، – دەدى سوبحاني.
سونىمەن قاتار ول ازەربايجان بيلىگى ءوز اۋماعىنىڭ يرانعا قارسى قولدانىلۋىنا جول بەرمەيتىنىن ايتقانىن جەتكىزدى. الايدا ەلشى سيونيستىك رەجيمنىڭ ەشقانداي ەرەجەگە باعىنبايتىنىن جانە ولار جاعدايدى پايدالانىپ قالۋى مۇمكىن ەكەنىن جوققا شىعارمادى.
ء«بىزدىڭ جاۋىمىز – سيونيستىك رەجيم – كورشى ەلدىڭ اۋماعىن پايدالانۋى مۇمكىن. ازەربايجان بۇعان جول بەرمەيتىنىن ايتتى. بىراق ءبارىمىز ولاردىڭ قانداي ەكەنىن بىلەمىز. سوندىقتان ىقتيمالدىق بار»، – دەدى ەلشى.
ازەربايجاندا جۇرگىزىلىپ جاتقان تەرگەۋدىڭ ناتيجەسىنە بايلانىستى يران تاراپىنان قانداي دا ءبىر رەاكتسيا بولاتىنىن جەتكىزگەن سوبحاني:
«تولىق اقپارات كەلگەن سوڭ عانا ناقتى باعا بەرۋگە بولادى. قازىر ناقتى دەرەكتەر جوق كەزدە قانداي دا ءبىر پىكىر ايتۋ دۇرىس ەمەس»، – دەپ تۇيىندەدى.
