فوتو: REUTERS
يران بيلىگى ەلدەگى ۇزاققا سوزىلعان قۇرعاقشىلىققا بايلانىستى جاساندى جولمەن جاڭبىر شاقىرۋ ماقساتىندا بۇلتتاردى وڭدەۋ پروتسەسىن ىسكە قوستى. بۇل تۋرالى Irna مەملەكەتتىك اگەنتتىگى جازدى، دەپ حابارلايدى "ادىرنا".
بۇلتتاردى ەگۋ – كۇمىس نەمەسە كالي ءيوديدى سياقتى ارنايى رەاگەنتتەردى ۇشاقتاردان نەمەسە جەر ءۇستى قۇرىلعىلارىنان بۇلتقا شاشۋ ءادىسى. مۇنداي رەاگەنتتەر سۋ بۋلارىنىڭ تەزىرەك كوندەنساتسيالانۋىنا اسەر ەتىپ، جاڭبىردىڭ ءتۇسۋىن جىلدامداتادى.
سەنبى كۇنى بۇل پروتسەسس تۇزدى ۋرميا كولى ۇستىندە جۇزەگە اسىرىلدى. ۋرميا – يرانداعى كاسپيدەن كەيىنگى ەڭ ءىرى كول، الايدا سوڭعى جىلدارى بولعان ۇزاق قۇرعاقشىلىق سالدارىنان ونىڭ ۇلكەن بولىگى كەۋىپ، ايدىن ورنى تۇزدى دالاعا اينالعان.
الداعى ۋاقىتتا بۇلتتاردى ەگۋ جۇمىسى شىعىس جانە باتىس ازەربايجان پروۆينتسيالارىندا (يران قۇرامىنداعى وبلىستار) جالعاسادى.
يران مەتەورولوگيا ۇيىمىنىڭ مالىمەتىنشە، بيىل ەلدە جاۋىن-شاشىن كولەمى كوپجىلدىق ورتاشا كورسەتكىشتەن 89% تومەن بولعان.
9 ميلليوننان استام حالقى بار استانا تەگەراندا دا جاعداي قيىن. قالاداعى سۋ قويمالارىنىڭ دەڭگەيى ءوز كولەمىنىڭ 10%-دان دا تومەن تۇسكەن. بيلىك سۋ بەرۋدى شەكتەۋ مۇمكىندىگىن جوققا شىعارمايدى، ال پرەزيدەنت ماسۋد پەزەشكيان ءتىپتى كەي ايماقتاردا حالىقتى ەۆاكۋاتسيالاۋ قاجەتتىلىگى تۋىنداۋى مۇمكىن ەكەنىن ايتقان.
بۇلتتاردى ەگۋ ءتاسىلى بىرنەشە ونداعان جىلدار بويى قولدانىلىپ كەلەدى. سوڭعى جىلدارى سۋ تاپشىلىعىمەن كۇرەسۋ ماقساتىندا بۇل ءادىستى بىرىككەن اراب امىرلىكتەرى بەلسەندى پايدالانعان.
كەي ەلدەردە، مىسالى رەسەيدە، بۇل ءادىس مەرەكەلەر كەزىندە جاڭبىر جاۋماۋى ءۇشىن قولدانىلعان.
1986 جىلعى چەرنوبىل اەس اپاتىنان كەيىن كەڭەس وداعى دا بۇلتتاردى ەگۋدى قولدانعان. تانىمال نۇسقالاردىڭ بىرىنە سايكەس، راديواكتيۆتى بولشەكتەردى سىڭىرگەن بۇلتتار ماسكەۋ مەن باسقا دا حالىق تىعىز ورنالاسقان ايماقتارعا جاڭبىر اكەلمەۋى ءۇشىن جاساندى تۇردە جاۋىن بەلارۋستىڭ وڭتۇستىك وڭىرلەرىنە تۇسىرىلگەن.
