«قازاقستان تەمىر جولى» ۇلتتىق كومپانياسى» اق باسقارما توراعاسىنىڭ قىزمەتى ءالى دە بوس تۇر. ال بۇل لاۋازىمعا ۋاقىتشا اتقارۋشى رەتىندە ەرلان قويشىباەۆ تاعايىندالدى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«قتج باسشىسى قىزمەتى ءالى دە بوس. رەسمي تاعايىنداۋ بولعان جوق، قويشىباەۆ ىشكى راسىمدەرگە سايكەس ۋاقىتشا مىندەتىن اتقارۋشى بولىپ تاعايىندالدى. بۇل باسقارما توراعاسى ەڭبەك دەمالىسىنا شىققان جاعدايمەن بىردەي – ونىڭ ورنىن ۋاقىتشا قويشىباەۆ باسار ەدى»، – دەدى دەرەككوز.
بۇعان دەيىن 2021 جىلدىڭ ساۋىرىنەن بەرى قتج-نى باسقارعان نۇرلان ساۋرانباەۆ كولىك ءمينيسترى بولىپ تاعايىندالعان بولاتىن. ول بۇل قىزمەتكە وسىعان دەيىن اتالعان مينيسترلىكتى باسقارعان مارات قاراباەۆتىڭ ورنىنا كەلدى. قاراباەۆ پرەزيدەنت قاسىم-جومارت توقاەۆتىڭ شەشىمىمەن جۇمىستان بوساتىلدى، وعان مينيسترلىك قىزمەتىندەگى كەمشىلىكتەرى ءۇشىن سوگىس جاريالانعان ەدى.
قتج باسشىسىنىڭ ۋاقىتشا مىندەتىن اتقارۋشى ەرلان قويشىباەۆ – ادەليا احمەتوۆانىڭ جۇبايى. ال ادەليا – 2014 جىلدان 2023 جىلعا دەيىن شىعىس قازاقستان وبلىسىن باسقارعان دانيال احمەتوۆتىڭ قىزى. احمەتوۆ «ەسكى قازاقستاننىڭ» ەڭ ىقپالدى وكىلدەرىنىڭ ءبىرى سانالىپ، ءوڭىردى باسقارعان تۇستا ءتۇرلى سىبايلاس جەمقورلىق جانجالدارى مەن جەكە مۇددەلەردى قولداۋ ارەكەتتەرى ءۇشىن قاتتى سىنعا ۇشىراعان. سىني پىكىرلەردە مەملەكەتتىك ساتىپ الۋلاردىڭ جابىق وتكىزىلىپ، بىردەي كومپانيالاردىڭ قايتا-قايتا جەڭىپ وتىرعانى، سونداي-اق جوبالاردىڭ بيۋدجەتتەرى بەكىتىلگەننەن كەيىن بىرنەشە ەسە ءوسىپ كەتكەنى ءجيى ايتىلعان. سونداي-اق احمەتوۆكە زاڭسىزدىقتار مەن ادىلەتسىزدىكتەرگە جول بەرگەنى، اينالاسىنداعى جەمقورلىق ارەكەتتەرگە كوز جۇمعانى جونىندە دە ايىپتاۋلار بولعان. ونىڭ وتباسىمەن بايلانىستى ۇلكەن قارجىلىق شىعىندارعا جانە تۇرعىسىن گەس قۇرىلىسىنا قاتىستى داۋلى جاعدايلارعا بايلانىستى جانجالدار ورىن العان. شقو تۇرعىندارى بىرنەشە مارتە ونىڭ وتستاۆكاسىن تالاپ ەتسە، كاسىپكەرلەر مەن قوعام بەلسەندىلەرى ونىڭ ساياساتىنا اشىق تۇردە قارسى شىققان.
