بەلگىلى جۋرناليست ءنۇردىلدا وراز جاڭا قىزمەتكە تاعايىندالدى. بۇل تۋرالى باتىس قازاقستان وبلىسى اكىمدىگى مالىمدەدى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ مالىمەتىنشە، مەملەكەتتىك قىزمەت ىستەرى اگەنتتىگىنىڭ كەلىسىمى بويىنشا جانە وبلىس اكىمىنىڭ وكىمىمەن باتىس قازاقستان وبلىسى قوعامدىق دامۋ باسقارماسىنىڭ باسشىسى لاۋازىمىنا ءنۇردىلدا وراز تاعايىندالعان.
ايتا كەتەيىك، ءنۇردىلدا وراز 1981 جىلى دۇنيەگە كەلگەن. ءبىلىمى جوعارى. ءال-فارابي اتىنداعى قازاق ۇلتتىق ۋنيۆەرسيتەتىن "جۋرناليستيكا" جانە قر ءىىم ب. بەيسەنوۆ اتىنداعى قاراعاندى اكادەمياسىن قۇقىق قورعاۋ قىزمەتى ماماندىقتارى بويىنشا بىتىرگەن.
ەڭبەك جولىن 2003 جىلى "31 ارنا" جشس "ينفورمبيۋرو" جاڭالىقتار قىزمەتىنىڭ كوررەسپوندەنت-جۇرگىزۋشىسى بولىپ باستاعان. 2004-2009 جىلدارى – "استانا" تەلەارناسىنىڭ رەپورتەر-ساراپشىسى، "قازاقستان" ۇلتتىق ارناسىنىڭ اقپاراتتىق-ساراپتامالىق باعدارلامالارىنىڭ رەداكتور-جۇرگىزۋشىسى بولعان.
2009 جىلى ىشكى ىستەر ورگانىندارىنا اۋىسىپ، استانا قالاسىنىڭ ىشكى ىستەر دەپارتامەنتىنىڭ ءتىل ساياساتى جانە اقپارات ءبولىمىنىڭ باسشىسى، ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى، ءمينيستردىڭ ءباسپاسوز حاتشىسى، كەيىننەن رەسمي وكىلى قىزمەتتەرىن اتقارعان.
