4 شىلدە كۇنى ەلوردادا استانا كۇنىنە وراي “اسىل مۇرا” اتتى ۇلتتىق مۋزىكا كەشى ۇيىمداستىرىلدى، دەپ حابارلايدى "ادىرنا" ۇلتتىق پورتالى Zakon.kz-كە سىلتەپ.
مۋزىكالىق كەش اياسىندا بەلگىلى ونەر قايراتكەرلەرى، تانىمال شىعارماشىلىق ۇجىمدار مەن ءداستۇرلى ونەردىڭ جاناشىرلارى ءبىر ساحنادا باس قوستى.
كەشكە قازاقستاننىڭ حالىق ارتىستەرى ايگۇل ۇلكەنباەۆا، ايگۇل قوسانوۆا جانە ەلگە بەلگىلى ونەر مايتالماندارى قاتىستى.
احات بايبوسىنوۆ، ايگۇل ەلشىباەۆا، ەلمۇرا جانابەرگەن، اقان ءابدۋالى، ارداق بالاجانوۆا، مەدەت سالىقوۆ، كلارا تولەنباەۆا، قايرات كاكىموۆ، ەربولات شالدىبەكوۆ، وزگەرىس شەرىكباي، پەريزات تۇراروۆا، ايگەرىم نارتۇيە، سەرىك جاقسىعۇلوۆ جانە ۇلبولسىن كەنجەباي ونەر كورسەتتى.
كلارا تولەنباەۆا بۇل كونتسەرتتىڭ استانا اكىمدىگىنىڭ قولداۋىمەن ءتورتىنشى رەت ءوتىپ جاتقانىن اتاپ ءوتتى.
"بۇگىنگى كەش – ۇلتتىق مۋزىكاعا دەگەن ەرەكشە قۇرمەت. مۇنداي كونتسەرتتەر تۇراقتى تۇردە وتكىزىلەدى، بىراق “اسىل مۇرا” – اتاۋىمەن دە، مازمۇنىمەن دە ايرىقشا. بۇل – ءبىزدىڭ باعا جەتپەس مۇرامىز. وسى مۇرانى ساقتاپ، كەلەر ۇرپاققا جەتكىزۋ – ءبىزدىڭ مىندەتىمىز", – دەدى ول.
كەش بارىسىندا ۇلى ابايدىڭ 180 جىلدىعىنا وراي اقىننىڭ اندەرى مەن حالىقتىڭ سۇيىكتى تۋىندىلارى دا ورىندالدى.
ايتا كەتەيىك، بەيبىتشىلىك جانە كەلىسىم سارايىندا وتكەن كونتسەرت كورەرمەندەرگە لىق تولدى.
