فوتو: digital business
1 قىركۇيەكتەن باستاپ قازاقستانداعى ايىرباستاۋ بەكەتتەرى ۆاليۋتا باعامدارى كورسەتىلگەن ەلەكتروندىق تابلونى الىپ تاستاۋعا مىندەتتى بولادى. ۇلتتىق بانك توراعاسى تيمۋر سۇلەيمەنوۆ ۆاليۋتا باعامىنىڭ تابلوسىن عيمارات ىشىنە كىرگىزبەگەن ايىرباستاۋ بەكەتتەرىنە قانداي شارا قولدانىلاتىنىن ايتتى، دەپ حابارلايدى “ادىرنا”.
ۇلتتىق بانك باسشىسى بۇل تالاپقا باعىنباعان كاسىپكەرلەرگە قانداي شارا قولدانىلاتىنىن ايتتى.
تيمۋر سۇلەيمەنوۆتىڭ ايتۋىنشا، ەگەر ايىرباستاۋ ورىندارى بۇل تالاپتى ورىنداماسا، ولارعا ايىپپۇل سالىنادى. بۇل ءۇشىن جاۋاپكەرشىلىك ەلىمىزدىڭ اكىمشىلىك كودەكسىندە قاراستىرىلعان. ايىپپۇل مولشەرى 3-تەن 5 ايلىق ەسەپتىك كورسەتكىشكە دەيىن، ياعني شامامەن 12 مىڭنان 19 مىڭ تەڭگەنى قۇراۋى ىقتيمال.
سۇلەيمەنوۆ اتاپ وتكەندەي، بۇل ماسەلەنى ۇلتتىق بانكتىڭ وڭىرلىك فيليالدارى باقىلاپ وتىرادى.
بۇل وزگەرىس ۆاليۋتا نارىعىنداعى اشىق ەمەس جارناما مەن ادامداردى جاڭىلىستىرۋدىڭ الدىن الۋ ءۇشىن جاسالىپ وتىر. ۇلتتىق بانك ايىرباستاۋ پۋنكتەرىنىڭ سىرتقى اقپاراتتىق قۇرالدار ارقىلى كليەنتتەردى «ارزان باعامەن» تارتۋ ارەكەتىن شەكتەۋگە نيەتتى.
ۆاليۋتا كۋرسى جازىلعان تابلونى الىپ تاستاۋ ماسەلەسى ءساۋىر ايىندا كوتەرىلدى. سول كەزدە ۇلتتىق بانك ارنايى قاۋلى جوباسىن جاريالاعان. ال ۇب توراعاسى تيمۋر سۇلەيمەنوۆ «كۋرس جازىلعان تابلو – توقسانىنشى جىلداردان قالعان اناحرونيزم» دەپ مالىمدەگەن.
ايىرباستاۋ پۋنكتتەرى قاۋىمداستىعى بۇل جاڭالىققا قارسى شىقتى. ولار كۋرس جازىلعان تابلو الەۋمەتتىك ماڭىزى بار اقپارات رەتىندە اشىق ءىلىنۋى كەرەك، قاۋىپسىزدىككە ەش اسەرى جوق دەپ ەسەپتەيدى.
