الماتى وبلىسىندا ەر ادام ايەلىن قاتىگەزدىكپەن ۇرىپ-سوعىپ، بۇل ارەكەتىن ۆيدەوعا تۇسىرگەن، دەپ حابارلايدى "ادىرنا" ۇلتتىق پورتالى.
جابىرلەنۋشى – اسيام ەسىمدى ايەل – وقيعانىڭ ۆيدەوجازباسىن الەۋمەتتىك جەلىدە جاريالاپ، شابۋىلدىڭ ەگجەي-تەگجەيىن بايانداعان. ونىڭ ايتۋىنشا، كۇيەۋى ناشاقورلىقتان زارداپ شەگەتىن كورىنەدى.
كۇيەۋى ونى تۇنشىقتىرىپ، باسىنان جانە بەتىنەن سوققى جاساپ، شاشىنان سۇيرەپ جۇلقىلاعان. سالدارىنان ايەلدىڭ مۇرنى سىنعان، قۇلاعى جاراقاتتانىپ، دەنەسىنىڭ بىرنەشە جەرىنە قانتالاعان ىزدەر تۇسكەن.
«مەن بۇل ناشاقوردى كەشىرمەيمىن. ول مەنى ولتىرسە دە، تۋىستارىما ءبارىبىر سياقتى. تەك سىنىپتاستارىما ۇلكەن راحمەت – تەك سولار مەنى قۇتقارىپ قالدى. شەلەك اۋرۋحاناسى مەن پوليتسياسى مەنى ءبىر-بىرىنە سىلتەپ، قايتا-قايتا قۋىپ جىبەردى. تاڭ اتقانشا كوشەدە ساندالىپ ءجۇردىم»، – دەپ جازدى جابىرلەنۋشى.
الماتى وبلىسى پوليتسيا دەپارتامەنتىنىڭ ءباسپاسوز قىزمەتى مالىمدەگەندەي، بۇل فاكتى بويىنشا قىلمىستىق ءىس قوزعالىپ، كۇدىكتى ۋاقىتشا ۇستاۋ يزولياتورىنا قامالعان.
«قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. تەرگەۋ ورگاندارى وقيعانىڭ بارلىق ءمان-جايىن جان-جاقتى جانە وبەكتيۆتى انىقتاۋ ءۇشىن قاجەتتى شارالاردى قابىلداپ جاتىر. ناتيجەسىندە پروتسەسسۋالدىق شەشىم قابىلدانادى»، – دەپ مالىمدەدى پوليتسيا وكىلدەرى
