جامبىل وبلىسىنداعى رەسپۋبليكالىق ماڭىزى بار تاسجولدا ءىرى جول-كولىك وقيعاسى ورىن الدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
اقپاراتقا سايكەس، توتەنشە جاعداي تاڭعى ساعات 09:40-تا رەسپۋبليكالىق ماڭىزى بار ەكاتەرينبۋرگ – الماتى تاسجولىنىڭ 451-شاقىرىمىندا تىركەلگەن.
پوليتسيانىڭ مالىمەتىنشە، Toyota Alphard ماركالى مينيۆەننىڭ جۇرگىزۋشىسى رولگە يە بولا الماي، سول باعىتتا كەلە جاتقان SDLG ەكسكاۆاتور-تيەگىش تەحنيكاسىمەن سوقتىعىسقان.
جول اپاتى سالدارىنان Toyota Alphard كولىگىنىڭ جۇرگىزۋشىسى مەن ءۇش جولاۋشىسى وقيعا ورنىندا قازا تاپقان. تاعى ءبىر جولاۋشى مەن ەكسكاۆاتور جۇرگىزۋشىسى اۋرۋحاناعا جەتكىزىلگەنى حابارلاندى.
اتالعان فاكتى بويىنشا قر قك 345-بابى 4-بولىگى (ادام ولىمىنە اكەپ سوققان جول قوزعالىسى ەرەجەسىن بۇزۋ) بويىنشا سوتقا دەيىنگى تەرگەۋ باستالدى. ەكى كولىك ارنايى تۇراققا قويىلدى.
