وزبەكستاندا قارۋلى كۇشتەر اكادەمياسى بازاسىندا اسكەري قاۋىپسىزدىك جانە قورعانىس ۋنيۆەرسيتەتى قۇرىلماق، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
جاڭا جوعارى وقۋ ورنى قورعانىس مينيسترلىگىنىڭ نەگىزگى اسكەري ءبىلىم بەرۋ مەكەمەلەرىن بىرىكتىرەدى. ولاردىڭ قاتارىندا بەس اسكەري ينستيتۋت، سەرجانتتاردى دايارلاۋ بويىنشا جوعارى مەكتەپ، اۆياتسيا مەن ۇشقىشسىز اپپاراتتار ماماندارىن دايارلاۋ مەكتەبى بولماق. بۇل مەكەمەلەر ينستيتۋت مارتەبەسىن الادى.
فەرعانا دەرەگىنشە، ۋنيۆەرسيتەت اياسىندا ورتالىقتاندىرىلعان ۆەرتيكالدى وقىتۋ جۇيەسى ەنگىزىلىپ، عىلىمي جەتىستىكتەر اسكەري كادرلاردى پراكتيكالىق دايارلاۋعا كەڭىنەن قولدانىلاتىن بولادى. اسىرەسە سەرجانتتاردى دايارلاۋ مەكتەبىندە كوشباسشىلىق قابىلەتتەردى دامىتۋ، زاماناۋي قارۋ-جاراق تۇرلەرىن مەڭگەرۋ جانە تاكتيكالىق تاسىلدەردى وقىتۋ جۇيەسى جاڭارتىلماق.
جاڭا مودەلدەردىڭ ءبىرى رەتىندە «2+2» قاعيداسى بويىنشا ارالاس وقىتۋ فورماتى ەنگىزىلەدى. بۇل جۇيە بويىنشا ازاماتتىق جوعارى وقۋ ورىندارىنىڭ ەكىنشى كۋرس ستۋدەنتتەرى ارنايى ىرىكتەۋدەن ءوتىپ، اسكەري باعىتتاعى 18 ماماندىق بويىنشا وقي الادى. ولاردىڭ قاتارىندا پسيحولوگ، بايلانىسشى، جابدىقتاۋ مامانى، قويماشى سىندى ماماندىقتار بار.
تالانتتى كۋرسانتتاردى ىنتالاندىرۋ ماقساتىندا جوعارعى باس قولباسشىنىڭ مەملەكەتتىك ستيپەندياسى تاعايىندالادى. بۇل ستيپەنديا يەگەرلەرى باكالاۆرياتتى اياقتاعان سوڭ بەس جىل ىشىندە ەمتيحانسىز اسكەري ماگيستراتۋراعا تۇسە الاتىنى ايتىلعان.
ايتا كەتەيىك، بۇعان دەيىن وزبەكستان پرەزيدەنتى قارۋلى كۇشتەردى تسيفرلاندىرۋدى جەدەلدەتىپ، بارلىق اسكەري قۇرىلىمداردىڭ اقپاراتتىق رەسۋرستارىن بىرىڭعاي قاۋىپسىز كەڭىستىككە بىرىكتىرۋدى تاپسىرعان بولاتىن.
