5 اقپاندا استانا سوتى رەسەيلىك اسكەري قىزمەتكەر ەۆگەني كوروبوۆقا بوسقىن مارتەبەسىن بەرۋدەن باس تارتتى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل تۋرالى ونىڭ قورعاۋشىسى، قازاقستان ادام قۇقىقتارى بيۋروسىنىڭ زاڭگەرى ارتۋر الحاستوۆ مالىمدەدى.
زاڭگەردىڭ ايتۋىنشا، رەسەيدىڭ ۋكرايناداعى اسكەري وپەراتسياسى باستالعالى بەرى قازاقستان ءدال وسىنداي شەشىمدى رەسەيلىك تاعى ون دەزەرتيرگە قاتىستى قابىلداعان.
ەۆگەني كوروبوۆ — اسكەري ۋچيليششە تۇلەگى، اعا لەيتەنانت جانە كاسىبي وفيتسەر. ول سوعىس باستالعاننان بەرى اسكەري قىزمەتتە بولعان. ءوز سوزىنشە، ەشكىمگە تىكەلەي وق اتپاعان. سونداي-اق تاپسىرمالاردىڭ بىرىندە مايداننان كەتۋ ءۇشىن ءوز اياعىنا وق اتقانىن ايتقان. 2022 جىلدىڭ سوڭىندا ەمدەلگەننەن كەيىن قازاقستانعا كەلىپ، ۋاقىتشا تۇرۋعا رۇقسات العان.
2024 جىلدىڭ ساۋىرىنەن باستاپ ول پانا سۇراۋشى مارتەبەسىندە بولعان. وسى ۋاقىت ىشىندە رەسەيدە وعان قاتىستى «دەزەرتيرلىك» بابى بويىنشا قىلمىستىق ءىس قوزعالىپ، الدىمەن فەدەرالدىق، كەيىن حالىقارالىق ىزدەۋ جاريالانعان. وسىدان كەيىن قازاقستاندا ۋاقىتشا تۇرۋعا رۇقساتتى ۇزارتۋ مۇمكىن بولماعان.
كوروبوۆ استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنا ەكى رەت بوسقىن مارتەبەسىن بەرۋ تۋرالى ءوتىنىش تۇسىرگەن. دەگەنمەن، ەكى جاعدايدا دا باس تارتىلعان. سوت ارقىلى بۇل شەشىمدى وزگەرتۋ ارەكەتى دە ناتيجە بەرمەدى. قورعاۋشى بۇل شەشىمگە اپەللياتسيا بەرەتىنىن ايتتى. ونىڭ پىكىرىنشە، كوروبوۆتىڭ سوعىسقا قاتىسۋدان باس تارتۋى ساياسي سەبەپتەرمەن قۋدالانۋعا نەگىز بولۋى مۇمكىن.
