شىعىس قازاقستان وبلىسى حالىقارالىق جاستار ديالوگىنىڭ الاڭىنا اينالدى. وڭىرگە شانحاي ىنتىماقتاستىق ۇيىمىنا (شىۇ) مۇشە ەلدەردىڭ جاس كوشباسشىلارىنان قۇرالعان دەلەگاتسيا رەسمي ساپارمەن كەلدى.
ساپار 2024 جىلعى 4 شىلدەدە استانادا وتكەن «شىۇ پليۋس» فورماتىنداعى سامميتتە قول جەتكىزىلگەن كەلىسىمدەر اياسىندا جۇزەگە اسىپ جاتىر. ول سامميتتە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جاھاندىق سىن-قاتەرلەر جاعدايىندا ۇيىمعا مۇشە مەملەكەتتەردىڭ بىرلىگى مەن بىرلەسكەن كۇش-جىگەرىنىڭ ماڭىزدىلىعىن اتاپ وتكەن بولاتىن.
دەلەگاتسيا قۇرامىنا قىتاي حالىق رەسپۋبليكاسى، رەسەي فەدەراتسياسى، قىرعىز رەسپۋبليكاسى، وزبەكستان جانە تاجىكستان رەسپۋبليكالارىنان كەلگەن جاس كوشباسشىلار، ەرىكتىلەر مەن قوعام بەلسەندىلەرى كىردى. ساپاردىڭ نەگىزگى ماقساتى – مادەنيەتارالىق ديالوگتى نىعايتۋ، جاستار اراسىنداعى ارىپتەستىكتى دامىتۋ جانە ورتاق باستامالاردى العا جىلجىتۋ.
باعدارلاما اياسىندا دەلەگاتسيا مۇشەلەرى ءوڭىردىڭ تاريحي-مادەني مۇرا نىساندارىن ارالادى: وسكەمەن قالاسىنىڭ سول جاعالاۋ كەشەنى، ابايدىڭ ءۇي-مۋزەيى، ەتنواۋىل مەن ءداستۇرلى قازاق كيىز ءۇيى. قوناقتاردىڭ ەرەكشە قىزىعۋشىلىعىن تۋدىرعان «ۇلى دالا التىنى» كورمەسىندە ساق-سكيف داۋىرىنە جاتاتىن بىرەگەي جادىگەرلەر – زەرگەرلىك بۇيىمدار، قارۋ-جاراق جانە ات ابزەلدەرى قويىلعان.
ساپاردىڭ باستى وقيعالارىنىڭ ءبىرى – ۇلان اۋدانىندا وتكەن ەتنوفەستيۆال بولدى. دەلەگاتسيا وكىلدەرى قازاق حالقىنىڭ قولونەرىمەن، سالت-داستۇرىمەن، ۇلتتىق تاعامدارى مەن فولكلورىمەن تانىسىپ، مادەنيەتىمىزدىڭ تەرەڭىنە ۇڭىلۋگە مۇمكىندىك الدى. سونىمەن قاتار، قاتىسۋشىلار ەرتىس وزەنىمەن سەرۋەندەپ، وسكەمەننىڭ تابيعي سۇلۋلىعىن تاماشالادى.
ءىس-شارا اياسىندا رەسمي كەزدەسۋلەرمەن قاتار بەيرەسمي جۇزدەسۋلەر دە ءوتتى. ديالوگ الاڭدارىندا ۆولونتەرلىك، تۇراقتى دامۋ، ەكولوگيا جانە شىۇ ەلدەرى جاستارى اراسىنداعى بايلانىستى نىعايتۋ ماسەلەلەرى تالقىلاندى.
جاقىن كۇندەرى شارالار جالعاسادى. جوسپاردا – پىكىرتالاس سەسسيالارى، مادەني ءىس-شارالار جانە ءوڭىردىڭ بەلسەندى جاستارىمەن كەزدەسۋلەر بار. وسىلايشا، شىعىس قازاقستان اشىق ديالوگ پەن حالىقارالىق ارىپتەستىك كەڭىستىگى رەتىندەگى مارتەبەسىن تاعى ءبىر مارتە دالەلدەدى.
