باكۋدە ءوتىپ جاتقان ازياداعى ءوزارا ءىس-قيمىل جانە سەنىم شارالارى كەڭەسىنىڭ VII ءسامميتى اياسىندا پرەزيدەنت قاسىم-جومارت توقاەۆ يزرايل پرەزيدەنتى يتسحاك گەرتسوگپەن كەزدەستى. بۇل تۋرالى 15 قازاندا اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مەملەكەتتەر باسشىلارى قازاقستان-يزرايل قارىم-قاتىناسى قارقىندى سيپات العانىنا توقتالدى. سونداي-اق ساۋدا-ەكونوميكالىق جانە ينۆەستيتسيالىق ىقپالداستىققا دەن قويا وتىرىپ، ماڭىزدى باعىتتار بويىنشا ىنتىماقتاستىقتى دامىتۋ پەرسپەكتيۆاسىن تالقىلادى.
قاسىم-جومارت توقاەۆ يتسحاك گەرتسوگتىڭ ءساۋىر ايىندا استاناعا جاساعان ساپارى مەملەكەتتەر اراسىنداعى بايلانىستى نىعايتۋعا ايتارلىقتاي سەرپىن بەرگەنىنە نازار اۋداردى.
يزرايل پرەزيدەنتى دە قازاقستانعا ساپارىن ريزاشىلىقپەن ەسكە الدى. ونىڭ پىكىرىنشە، ەلىمىزدىڭ كوپتەگەن سالادا العا باسۋى ەكىجاقتى ىقپالداستىقتى ىلگەرىلەتۋگە جول اشادى.
يتسحاك گەرتسوگ قازاقستاننىڭ بەيبىتشىلىك كەڭەسىنە قوسىلۋىن قۇپتاپ، بۇل وقيعانىڭ بەيبىتشىلىك پەن تۇراقتىلىقتى نىعايتۋعا قوسىلعان زور ۇلەس ەكەنىن اتاپ ءوتتى.
سونداي-اق تاراپتار حالىقارالىق كۇن تارتىبىندەگى وزەكتى ماسەلەلەر، سونىڭ ىشىندە تاياۋ شىعىستاعى احۋال جونىندە پىكىر الماستى.
مەملەكەت باسشىسى شيەلەنىستى باسەڭدەتىپ، قاقتىعىستاردى ديپلوماتيا قۇرالدارى ارقىلى رەتتەۋ قاجەتتىگىن جەتكىزدى جانە قازاقستاننىڭ وسى قاعيداتتى بەرىك ۇستاناتىنىن ايتتى.
