قىرعىز رەسپۋبليكاسىنىڭ سىرتقى ىستەر مينيسترلىگى يران مەن يزرايل اراسىنداعى قاقتىعىستىڭ شيەلەنىسۋىنە بايلانىستى ۇلكەن الاڭداۋشىلىق بىلدىرەدى. بۇل تۋرالى ۆەدومستۆا تاراتقان حابارلامادا ايتىلعان، دەپ حابارلايدى “ادىرنا” ۇلتتىق پورتالى.
وندا قىرعىز رەسپۋبليكاسى تاراپتاردى تاياۋ شىعىستاعى جاعدايدىڭ تۇراقسىزدانۋىنا اكەلەتىن بۇدان ءارى اسكەري ارەكەتتەردەن باس تارتۋعا شاقىراتىنى اتاپ وتىلەدى.
«قىرعىزستان تاعى دا تاراپتاردى حالىقارالىق قۇقىقتىڭ جالپى تانىلعان قاعيداتتارى مەن نورمالارىنا، ەڭ الدىمەن بۇۇ جارعىسىنا سايكەس بەيبىت جولمەن شەشۋگە شاقىرادى»، - دەلىنگەن ءسىم حابارلاماسىندا.
ايتا كەتەيىك، ءساۋىردىڭ 14-ىنە قاراعان ءتۇنى يران يزرايلگە ۇشقىشسىز ۇشاقتارمەن جانە قاناتتى زىمىراندارمەن شابۋىل جاسادى. يزرايل قورعانىس كۇشتەرى يراننىڭ 300-گە جۋىق سناريادىنىڭ 99 پايىزىن ۇستاعانىن حابارلادى. تەگەران بۇل سوققىنى ءساتتى دەپ سانايدى.
بۇعان قوسا، يران بىرنەشە اراب ەلدەرى ارقىلى اقش-قا ۆاشينگتون يران مەن يزرايل اراسىنداعى قاقتىعىسقا ارالاسسا، ايماقتاعى امەريكالىق بازالارعا شابۋىل جاسالاتىنىن ەسكەرتتى.
