ارمەنيا پرەمەر-ءمينيسترى نيكول پاشينيان انكلاۆتار مەن ەكسكلاۆتار ماسەلەسىن شەشۋ ءۇشىن ازەربايجانعا كولەمى بىردەي اۋماقتارمەن الماسۋدى ۇسىندى. بۇل تۋرالى ربك جازدى، دەپ حابارلايدى «ادىرنا» ءتىلشىسى.
نيكول پاشينيان ازەربايجانمەن شەكارانى دەليميتاتسيالاۋ جانە دەماركاتسيالاۋ ۇدەرىسىن ءساتتى جۇزەگە اسىرۋدىڭ نەگىزگى شارتتارىن اتادى. ونىڭ سوزىنشە، شەكارانى بەلگىلەۋ جۇمىستارى تەك الماتى دەكلاراتسياسىنا نەگىزدەلۋى كەرەك. سونىمەن قاتار ارمەنيانىڭ ەگەمەن اۋماعىنىڭ كولەمى وزگەرىسسىز قالىپ، 29 743 شارشى شاقىرىمدى قۇراۋعا ءتيىس.
«شەكارانىڭ ەكى جاعىندا دا انكلاۆتار مەن ەكسكلاۆتار بولماۋى ءتيىس. ياعني ارمەنيا مەن ازەربايجان اۋماعىنىڭ ناقتى كولەمى بىردەي بولىكتەرىمەن الماسۋى كەرەك»،– دەدى ول.
پرەمەر-ءمينيستردىڭ ايتۋىنشا، ارمەنيا مەن ازەربايجان ءبىر-بىرىنە ەشقانداي اۋماقتىق تالاپ قويماۋى قاجەت. ونىڭ ىشىندە قاراباق، گاردمان، شيرۆان، ناحچىۆان نەمەسە «باتىس ازەربايجان» ماسەلەلەرىنە قاتىستى دا تالاپتار بولماۋعا ءتيىس.
سونداي-اق ول «بەيبىتشىلىك قيىلىسى» جوباسى اياسىندا دا، ودان تىس تا بارلىق كولىك قاتىناسى قالپىنا كەلتىرىلۋى كەرەكتىگىن اتاپ ءوتتى. ارمەنيا مەن ازەربايجان اۋماعى ارقىلى وتەتىن بارلىق جول كولىك قوزعالىسى ءۇشىن اشىق بولۋى قاجەت.
ەسكە سالايىق، 2025 جىلعى تامىزدا اقش پرەزيدەنتى دونالد ترامپتىڭ قاتىسۋىمەن ۆاشينگتوندا ارمەنيا مەن ازەربايجان باسشىلارى ەكى ەل اراسىنداعى بەيبىت قارىم-قاتىناس تۋرالى دەكلاراتسياعا قول قويعان. بۇل وقيعا ارمەنيا مەن ازەربايجان اراسىنداعى قانتوگىسكە ۇلاسقان قاقتىعىستىڭ باستالعانىنا شامامەن 40 جىل وتكەن سوڭ بولدى.
وسىدان كەيىن پرەزيدەنت قاسىم-جومارت توقاەۆ ۆاشينگتوندا قول قويىلعان ازەربايجان مەن ارمەنيا اراسىنداعى بەيبىت كەلىسىمدى جوعارى باعالاپ، اقش-تىڭ دەلدالدىق ءرولىن جانە قازاقستاننىڭ قوسقان ۇلەسىن اتاپ ءوتتى.
2024 جىلعى ساۋىردە ارمەنيا مەن ازەربايجان اراسىندا ۇزاق ۋاقىت كۇتكەن مەملەكەتتىك شەكارانى دەليميتاتسيالاۋ ۇدەرىسى باستالدى. ول كەزدە شەكارا ماڭىنداعى ازەربايجاننىڭ ءتورت اۋىلى ورنالاسقان اۋماق تۋرالى ءسوز بولدى. ارمەنيا بۇل اۋماقتاردى ازەربايجانعا قايتارۋعا كەلىسكەن ەدى.
