ازەربايجاندا جاڭا وقۋ جىلىنان باستاپ 5-6 سىنىپ وقۋشىلارى «ازەربايجان تاريحى» ءپانىن تەك مەملەكەتتىك تىلدە وقيتىن بولادى، دەپ حابارلايدى «ادىرنا» ءتىلشىسى APA اگەنتتىگىنە سىلتەمە جاساپ.
بۇعان دەيىن وزگە تىلدە ءبىلىم بەرەتىن 6-سىنىپتاردا «ازەربايجان تاريحى» ءپانى سول وقۋ تىلىنە سايكەس وقىتىلعان ەدى.
«شەشىم 2025-2026 وقۋ جىلىنا ارنالعان جالپى ءبىلىم بەرەتىن وقۋ ورىندارىنىڭ وقۋ جوسپارلارىن بەكىتۋ تۋرالى عىلىم جانە ءبىلىم ءمينيسترى ەمين امرۋللاەۆتىڭ بۇيرىعىمەن بەكىتىلگەن»،—دەلىنگەن حابارلامادا.
مينيسترلىكتىڭ شەشىمى ۇلتتىق تاريحتى وقىتۋدا مەملەكەتتىك ءتىلدىڭ قولدانىسىن كۇشەيتۋدى جانە جاس ۇرپاقتىڭ تىلدىك ءارى تاريحي ءبىلىمىن تەرەڭدەتۋدى ماقسات ەتىپ وتىر.
بۇدان بولەك، بيلىك 150–160 مىڭعا جۋىق بالا وقيتىن 340 ءورىستىلدى مەكتەپتى ءۇش جىل ىشىندە كەزەڭ-كەزەڭىمەن ازەربايجان تىلىنە كوشىرىپ، مۇعالىمدەردى قايتا دايارلاۋدى جوسپارلاپ وتىرعاندارىن جەتكىزدى.
«ۆفوكۋسە» اگەنتتىگى ازەربايجاندىق اتا-انالاردىڭ كونستيتۋتسيانىڭ 21 جانە 45-باپتارىنا سۇيەنىپ، ءبىلىم الۋدى قالاعان تىلدە قامتاماسىز ەتەتىن قۇقىقتارىن العا تارتقانىن جازدى. ولار بۇل وزگەرىستى سوتتا داۋلاۋعا تىرىسقان. الايدا باكۋ اكىمشىلىك سوتى مەن اپەللياتسيالىق ينستانتسيا اتا-انالاردىڭ تالاپ-ارىزدارىن قابىلداماي، مەملەكەتتىك ساياساتتىڭ باسىمدىعىن العا تارتقان.
ايتا كەتەيىك، بۇل رەفورما باكۋ مەن ماسكەۋ اراسىنداعى قاتىناستاردىڭ شيەلەنىسۋىمەن تۇسپا-تۇس كەلىپ وتىر. 27 ماۋسىمدا ەكاتەرينبۋرگ قالاسىندا ازەربايجاندىقتاردىڭ ۇيلەرىنە جۇرگىزىلگەن رەيد كەزىندە ەكى ادام قازا تاۋىپ، بىرنەشەۋى اۋىر جارالانعان بولاتىن. وسى وقيعادان كەيىن ازەربايجان سىرتقى ىستەر مينيسترلىگى رەسەيدىڭ باكۋدەگى ەلشىسى پەتر ۆولوكوۆتى شاقىرتىپ الىپ، وقىس وقيعاعا قاراتا قاتاڭ نارازىلىق ءبىلدىرىپ، قىلمىسقا قاتىسى بار كىنالى ادامداردى جاۋاپقا تارتۋدى ەسكەرتىپ ەدى. كەيىن ازەربايجاندا رەسەيدىڭ مەملەكەتتىك جانە جەكە مەكەمەلەرى جوسپارلاعان بارلىق بىرلەسكەن مادەني ءىس-شارالار توقتاتىلعانى ايتىلدى.
