قازاق ءتىلى تۇركى تەكتەس حالىقتار تىلدەرى ىشىندەگى ەڭ باي ءتىل دەپ ماقتانعاندا جەر كوككە سىيمايمىز. ماقتانىشىمىز ورىندى. مۇنى ايعاقتايتىن ءار جىلدارى باسىلعان تۇسىندىرمە سوزدىكتەرىمىز دە (2 تومدىق، 10 تومدىق، 15 تومدىق دەگەندەي) جەتكىلىكتى. ماقتانۋعا كەلگەندە قازاق ءسوزى ازدىق ەتسە، انالاردىڭ اناسى دەگەن قاسيەتتى ۇعىم بىلدىرەتىن «ۇماي انا» دەگەن ءسوزدى بىلمەمەك تە (ويتكەنى تۇسىندىرمە سوزدىكتە جوق) ورىستىڭ «ماما» ءسوزىن قازاق ءتىلى دەپ ءتۇسىندىرىپ، تۇسىندىرمە سوزدىگىمىزگە كىرگىزىپ، انا ءتىلىمىزدى «بايىتىپ» قويامىز.
بىراق تۇسىندىرمە سوزدىكتەردە (بىرىندە ەمەس، بارىندە) قاتە تۇسىندىرگەن سوزدەردىڭ ون ەمەس، ءجۇز ەمەس مىڭداپ سانالاتىنىن، ءتىپتى، كۇندەلىكتى قولدانىستاعى مىڭ ءسوزدىڭ كىرمەي قالعانىن ايتىپ جاھانعا جار سالساق تا قازاقستان رەسپۋبليكاسىنىڭ تىلگە قۇزىرلى مەكەمەلەرى (مينيسترلىكتەن باستاپ) قاپەرىنە ىلگەن جوق. بۇگىندەرى بارلىق ارپارات قۇرالدارى ء«وز تىلدەرىندە» سايراپ ءجۇر.
بىرەگەي «ۇلتتىق تەلەارنانىڭ» بىلدەي جۇرگىزۋشىسى شەرحان جامبىلۇلىنىڭ اۋزىنان «5 جاسار بالا «باس ميى» جارقاتىن الدى» دەگەن ءسوزدى ەستىگەنىمىزدە ميىمىز زىرق ەتە قالدى. (6-تامىز، قورىتىندى اقپارات) تىلىڭە تەرىسكەن شىعاراتىن بۇل تىركەس شەرحاننىڭ اۋىزىنان وقىس شىققان جوق، ەكراننىڭ تومەنگى بولىگىنە باتتيتىپ تۇرىپ جازىپ تا قويعان.
«سەنگەن قويىم سەن بولساڭ ماڭىراعانىڭنان» دەگەندەي ۇلتتىق ارنامىزدىڭ ءتىلى وسىلاي بولسا، وزگە اقپارات قۇرالدارىنا سىن قويۋ ارتىق بولار. سوندا ۇلتتىق ارنانىڭ باس ميى مەن باسقا ميلارى قاي جەرلەرىندە؟
بوداۋحان توقانۇلى، جۋرناليست
