پرەزيدەنت تۇرىكمەنستان جەرىنە بارىپ، بۇۇ اياسىندا وتكەن تەڭىزگە شىعار جولى جوق دامۋشى ەلدەرگە ارنالعان كونفەرەنتسياعا قاتىسقانىن بىلەتىن شىعارسىزدار.
ول جەردە بۇۇ باس حاتشىسى انتونيۋ گۋتەرريش تە قاتىستى. ول جاقىندا عانا الماتىعا كەلىپ، ۇيىمنىڭ كەڭسەسىندە بولدى. جالپى بۇل ماڭىزدى شارالار ما؟
اقش 2021 جىلى اۋعانستاننان اسكەرىن شىعارعان كەزدە بۇل ەلدەگى جاعداي ۋشىقتى. سول ۋاقىتتا بۇۇ ءوزىنىڭ وڭىرلىك كەڭسەسىن الماتىعا كوشىرگەن ەدى. كەيىنىرەك وڭىرلىك ورتالىق تۇبەگەيلى الماتىعا ورىن تەۋىپ، ارنايى كەڭسەسى اشىلاتىنى بەلگىلى بولدى.
وسىلايشا، قازاقستان بىرىككەن ۇلتتار ۇيىمىنىڭ ماڭىزدى حابىنا اينالدى دەسەك تە بولادى.
الماتى ەندىگى جەردە جەنەۆا، ۆەنا، ريم، نايروبي، اممان سەكىلدى قالالارمەن ءبىر قاتاردا تۇر. دەمەك، بۇۇ قازاقستاندى وڭىردەگى تۇراقتى مەملەكەتتىڭ ءبىرى سانايدى. ەلىمىز ۇستانىپ وتىرعان سىرتقى ساياساتقا قولداۋ بىلدىرەدى دەگەن ءسوز.
قازاقستانعا كەلگەن انتونيۋ گۋتەرريش تە ەلىمىزگە جوعارى باعا بەردى. قازاقستاندى بەيبىتشىلىك پەن دانالىقتىڭ سيمۆولى، حالىقتار اراسىنداعى التىن كوپىر، مامىلەگەر رەتىندە ەسەپتەيتىنىن جەتكىزدى. مۇنى ديپلوماتيالىق سىپايىلىق ەمەس، ەلىمىزدىڭ ۇستانعان سىرتقى ساياساتىنىڭ حالىقارالىق ارەنادا باعالانعانى دەپ بىلگەن ءجون.
سونداي-اق گۋتەرريش مىرزا توقاەۆتىڭ كورەگەندىگىن دە ەرەكشە اتاپ ءوتتى. ۇزاق ۋاقىت بويى ديپلوماتيا سالاسىندا جۇرگەنىن، بۇۇ-نىڭ جەنەۆاداعى كەڭسەسىن باسقارعانىن جوعارى باعالاپ، حالىقارالىق قۇقىقتى ساقتاپ، الەمدەگى تۇراقتىلىقتى ساقتاۋعا ۇلەس قوسىپ كەلە جاتقانىن ءسوز ەتتى.
بۇۇ-نىڭ اۋعانستان جانە ورتالىق ازيا جونىندەگى كەڭسەسىنىڭ الماتىدا اشىلۋى، وعان گۋتەرريش مىرزانىڭ ءوزى كەلىپ قاتىسۋى، توقاەۆ پەن قازاقستانعا باعا بەرۋى ەلىمىزدىڭ ابىرويىن اسقاقتاتىپ تاستادى دەسەك، قاتەلەسپەيمىز.
