قازاقستاندا ارتيللەريالىق وق-ءدارى وندىرەتىن العاشقى زاۋىتتىڭ قۇرىلىسى باستالدى. جوبا ASPAN باعدارلاماسى اياسىندا جۇزەگە اسىرىلىپ جاتىر. ءوندىرىس ىشكى ارميانىڭ قاجەتتىلىگىن وتەپ قانا قويماي، بولاشاقتا ەكسپورتقا دا باعىتتالماق، دەپ حابارلايدى "ادىرنا".
جوبانى Great Sky كومپانياسى ىسكە اسىرادى. العاشقى نىسان — ASPAN-1 زاۋىتى ارتيللەريالىق سناريادتار مەن مينالاردىڭ كورپۋستارىن وندىرەتىن بولادى. ءوندىرىستى ىسكە قوسۋ 2027 جىلعا جوسپارلانعان.
جوبا تۋرالى Great Sky كومپانياسى باس ديرەكتورىنىڭ ءبىرىنشى ورىنباسارى اندرەي تيحونەنكو مالىمدەدى. ونىڭ ايتۋىنشا، ءوندىرىس قازاقستاندىق شيكىزات بازاسىنا سۇيەنەدى. اتاپ ايتقاندا، وتاندىق مەتالل، ماقتا، قىشقىلدار جانە وزگە دە ماتەريالدار پايدالانىلماق. ASPAN باعدارلاماسىنىڭ جالپى قۇنى شامامەن 500 ملرد تەڭگەگە باعالانىپ وتىر.
جوبا اياسىندا قازاقستان قارۋلى كۇشتەرىندە قولدانىلاتىن:
-
82 مم جانە 120 مم مينوميوت مينالارى،
-
122 مم جانە 152 مم ارتيللەريالىق سناريادتار شىعارىلماق.
سونىمەن قاتار ەكسپورتقا باعىتتالعان ناتو ستاندارتىنداعى وق-دارىلەردى ءوندىرۋ دە كوزدەلگەن. ولاردىڭ قاتارىندا:
-
155 مم (M107, M795) ارتيللەريالىق سناريادتار،
-
60 مم مينالار بار.
Great Sky — استانادا تىركەلگەن قازاقستاندىق كومپانيا. Kompra دەرەكتەرىنە سايكەس، كومپانيا قۇرىلتايشىلارىنىڭ ءبىرى — ايبەك بارىسوۆ، ول قورعانىس-ونەركاسىپ كەشەنى كاسىپورىندارى قاۋىمداستىعىنىڭ باسقارما توراعاسى. كومپانيا قىزمەتىنىڭ نەگىزگى باعىتتارى رەتىندە مەتالل بۇيىمدارىن ءوندىرۋ، سونداي-اق قورعانىس پەن ۇلتتىق قاۋىپسىزدىك سالاسىنداعى عىلىمي-زەرتتەۋ جانە تاجىريبەلىك-كونسترۋكتورلىق جۇمىستار كورسەتىلگەن.
جوبا تۋرالى اقپارات رەسەي تاراپىنان دا رەاكتسيا تۋدىردى. رف مەملەكەتتىك دۋماسىنىڭ قورعانىس كوميتەتى توراعاسىنىڭ ءبىرىنشى ورىنباسارى الەكسەي جۋراۆليوۆ قازاقستاننىڭ ناتو ستاندارتىنداعى وق-دارىلەردى وندىرۋگە كوشۋىن «دوستىققا جات قادام» دەپ اتتانداعان. ايتا كەتەيىك، بۇعان دەيىن قازاقستان مەن ۇلىبريتانيا 2025–2026 جىلدارعا ارنالعان اسكەري ىنتىماقتاستىق جوسپارىنا قول قويعان بولاتىن. قۇجات بەيبىتشىلىك ميسسيالارى، تىلدىك دايارلىق جانە قازاقستاندىق وفيتسەرلەردى ۇلىبريتانيانىڭ اسكەري اكادەميالارىندا وقىتۋ ماسەلەلەرىن قامتيدى.
