Qazaqstanda artilleriialyq oq-därı öndıretın alǧaşqy zauyttyŋ qūrylysy bastaldy. Joba ASPAN baǧdarlamasy aiasynda jüzege asyrylyp jatyr. Öndırıs ışkı armiianyŋ qajettılıgın ötep qana qoimai, bolaşaqta eksportqa da baǧyttalmaq, dep habarlaidy "Adyrna".
Jobany Great Sky kompaniiasy ıske asyrady. Alǧaşqy nysan — ASPAN-1 zauyty artilleriialyq snariadtar men minalardyŋ korpustaryn öndıretın bolady. Öndırıstı ıske qosu 2027 jylǧa josparlanǧan.
Joba turaly Great Sky kompaniiasy bas direktorynyŋ bırınşı orynbasary Andrei Tihonenko mälımdedı. Onyŋ aituynşa, öndırıs qazaqstandyq şikızat bazasyna süienedı. Atap aitqanda, otandyq metall, maqta, qyşqyldar jäne özge de materialdar paidalanylmaq. ASPAN baǧdarlamasynyŋ jalpy qūny şamamen 500 mlrd teŋgege baǧalanyp otyr.
Joba aiasynda Qazaqstan Qaruly küşterınde qoldanylatyn:
-
82 mm jäne 120 mm minomiot minalary,
-
122 mm jäne 152 mm artilleriialyq snariadtar şyǧarylmaq.
Sonymen qatar eksportqa baǧyttalǧan NATO standartyndaǧy oq-därılerdı öndıru de közdelgen. Olardyŋ qatarynda:
-
155 mm (M107, M795) artilleriialyq snariadtar,
-
60 mm minalar bar.
Great Sky — Astanada tırkelgen qazaqstandyq kompaniia. Kompra derekterıne säikes, kompaniia qūryltaişylarynyŋ bırı — Aibek Barysov, ol Qorǧanys-önerkäsıp keşenı käsıporyndary qauymdastyǧynyŋ basqarma töraǧasy. Kompaniia qyzmetınıŋ negızgı baǧyttary retınde metall būiymdaryn öndıru, sondai-aq qorǧanys pen ūlttyq qauıpsızdık salasyndaǧy ǧylymi-zertteu jäne täjıribelık-konstruktorlyq jūmystar körsetılgen.
Joba turaly aqparat Resei tarapynan da reaksiia tudyrdy. RF Memlekettık Dumasynyŋ Qorǧanys komitetı töraǧasynyŋ bırınşı orynbasary Aleksei Juravliov Qazaqstannyŋ NATO standartyndaǧy oq-därılerdı öndıruge köşuın «dostyqqa jat qadam» dep attandaǧan. Aita keteiık, būǧan deiın Qazaqstan men Ūlybritaniia 2025–2026 jyldarǧa arnalǧan äskeri yntymaqtastyq josparyna qol qoiǧan bolatyn. Qūjat beibıtşılık missiialary, tıldık daiarlyq jäne qazaqstandyq ofiserlerdı Ūlybritaniianyŋ äskeri akademiialarynda oqytu mäselelerın qamtidy.
