قازاقستاندا «اقتاۋ – تۇركى الەمىنىڭ مادەني استاناسى» باعدارلاماسى اياسىندا URKER حالىقارالىق انيماتسيالىق فيلمدەر فەستيۆالى ۇيىمداستىرىلدى، دەپ حابارلايدى "ادىرنا" ۇلتتىق پورتالى.
ازەربايجان انيماتسيا قاۋىمداستىعىنىڭ حابارلاۋىنشا، نەگىزگى بايقاۋ باعدارلاماسىندا بەلگىلى ازەربايجان رەجيسسەرى مەسۋد پەناحيدىڭ «نارگيز» انيماتسيالىق ءفيلمى كورسەتىلىپ، قازىلار شەشىمىمەن تۇركسوي ارنايى سىيلىعىنا يە بولدى. ماراپاتتى تۇركسوي باس حاتشىسى سۇلتان راەۆ ءفيلمنىڭ پروديۋسەرى، ازەربايجان انيماتسيا قاۋىمداستىعىنىڭ توراعاسى راشيد اعاماليەۆكە تابىستادى. سىيلىق تۇركى الەمىنىڭ مادەني مۇراسىن دامىتۋعا جانە كوركەمدىك ورنەگىنە قوسقان ۇلەسى ءۇشىن بەرىلدى.
فەستيۆال قازىلار القاسىن وزبەك رەجيسسەرى ماۆزۋر ماحمۇدوۆ باسقاردى. قۇرامىندا ازەربايجان مەن تۇركيا انيماتسيا قاۋىمداستىعىنىڭ وكىلدەرى، فين جانە ازەربايجان ستۋديالارىنىڭ ديرەكتورلارى، تۇرىك رەجيسسەرلەرى، قازاقستاندىق الەۋمەتتىك انتروپولوگ ەۆفرات ب. يمامبەك جانە قىرعىز رەجيسسەرى قانىبەك ومىربەكوۆ بولدى.
بايقاۋدان تىس باعدارلامادا رەجيسسەر نەزرين اعاماليەۆانىڭ «حاديس» ءفيلمى كورسەتىلدى.
فەستيۆالدى قر مادەنيەت جانە اقپارات مينيسترلىگى مەن ماڭعىستاۋ وبلىسى اكىمدىگى ۇيىمداستىردى. «جاڭا تۇركى ءداۋىرىنىڭ انيماتسياسى» ۇرانىمەن وتكەن شارا 5–8 تامىز ارالىعىندا ءوتتى.
