75 مىڭ قوناق، كول ۇستىندە قالىقتاعان مىڭداعان جارىق، رەكورد جاڭارتقان قازىبۋرگەر جانە تۇنگە دەيىن جالعاسقان مەرەكەلىك كوڭىل كۇي. Balkhash Tour Fest – 2026 بالقاش جاعالاۋىن ەلىمىزدەگى جازعى دەمالىستىڭ ەڭ تارتىمدى ورتالىقتارىنىڭ بىرىنە اينالدىرىپ، قازاقستانداعى ەڭ اۋقىمدى تۋريستىك ءىس-شارالاردىڭ ءبىرى رەتىندەگى مارتەبەسىن تاعى ءبىر مارتە ايقىندادى.
ەكى كۇن بويى كول جاعالاۋى سپورتتى، شىعارماشىلىقتى، وتباسىلىق دەمالىستى جانە جارقىن اسەرلەردى توعىستىرعان ۇلكەن مەرەكەلىك كەڭىستىككە اينالدى. فەستيۆالدىڭ العاشقى كۇنىندە عانا شامامەن 35 مىڭ ادام كەلسە، جالپى ەكى كۇن ىشىندە شاراعا 75 مىڭعا جۋىق قوناق قاتىستى. ولاردىڭ قاتارىندا قازاقستاننىڭ تۇكپىر-تۇكپىرىنەن كەلگەن دەمالۋشىلارمەن بىرگە شەتەلدىك تۋريستەر دە بولدى.
فەستيۆالدىڭ ەڭ اسەرلى باعدارلامالارىنىڭ ءبىرى – بەلگىلى قازاقستاندىق بالۋان سەرگەي تسىرۋلنيكوۆتىڭ قازاقتىڭ داڭقتى باتىرلارىنا ارنالعان شوۋى بولدى. ال كەشكى ۋاقىتتا كورەرمەندەردى بۇدان دا ەرەكشە توسىنسىي كۇتىپ تۇردى.
بالقاش تاريحىندا العاش رەت كول ايدىنىنىڭ ۇستىندە اۋقىمدى درون-شوۋ ۇيىمداستىرىلدى. اسپانعا كوتەرىلگەن 500 ۇشقىشسىز اپپارات جارىق ارقىلى قازاقستان مەن بالقاشتىڭ تاريحى مەن كەلبەتىن بەينەلەيتىن كوركەم كومپوزيتسيالار قۇردى.
دەگەنمەن فەستيۆالدىڭ مازمۇنى تەك اۋە شوۋىمەن شەكتەلگەن جوق.
ەكى كۇن بويى الاڭدا ونداعان تاقىرىپتىق ايماق قاتار جۇمىس ىستەپ، ءار جاستاعى قوناقتارعا ءوز قىزىعۋشىلىعىنا ساي دەمالىس ءتۇرىن تاڭداۋعا مۇمكىندىك بەردى.
فەستيۆال اياسىندا ەرەكشە گاسترونوميالىق رەكورد تا تىركەلدى.
ساحنا تورىندە سالماعى 86,4 كەلى بولاتىن قازاقستانداعى ەڭ ءىرى قازىبۋرگەر ازىرلەندى. بۇل جەتىستىكتى رەسمي تىركەۋ ءۇشىن قازاقستان رەكوردتار كىتابىنىڭ باس رەداكتورى ارنايى شاقىرىلدى.
سپورت سۇيەر قاۋىمدى Cuprum Swim جاپپاي ءجۇزۋ جارىسى بىرىكتىردى. ءبىر جانە ءۇش شاقىرىمدىق قاشىقتىقتارعا ەلىمىزدىڭ ءار وڭىرىنەن كەلگەن 300-گە جۋىق قاتىسۋشى شىقتى.
اۋەسقويلار اشىق سۋدا ءوز مۇمكىندىكتەرىن سىناسا، كاسىبي سپورتشىلار جۇلدەلى ورىندار ءۇشىن باق سىنادى. قاتىسۋشىلاردىڭ قاۋىپسىزدىگىن قامتاماسىز ەتۋ ءۇشىن بۇكىل باعىت بويىندا قۇتقارۋشىلار كەزەكشىلىك اتقاردى.
ەكى كۇنگە سوزىلعان بي ءتۋرنيرى قازاقستان مەن رەسەيدەن كەلگەن جاس دارىنداردىڭ باسىن قوستى. قاتىسۋشىلار باستى جۇلدە – شانحاي قالاسىنداعى حالىقارالىق FRESH DANCE CAMP بي لاگەرىنە جولداما ءۇشىن باق سىنادى. بايقاۋ قورىتىندىسى بويىنشا ورىنداۋشىلىق شەبەرلىگى مەن ساحنالىق مادەنيەتى ارقىلى قازىلار القاسىنىڭ جوعارى باعاسىنا يە بولعان استانالىق ءبيشى Rufina Lu گران-پري جۇلدەسىن جەڭىپ الدى.
فەستيۆال تانىمال قازاقستاندىق ونەرپازداردىڭ قاتىسۋىمەن وتكەن اۋقىمدى گالا-كونتسەرتپەن تۇيىندەلدى. مىڭداعان كورەرمەن سۇيىكتى اندەرىن بىرگە شىرقاپ، ەرەكشە اتموسفەرانىڭ كۋاسى بولدى. AYAU مەن فەستيۆالدىڭ حەدلاينەرى 6ELLUCCI-ءدىڭ ونەر كورسەتۋى كەشتىڭ شارىقتاۋ شەگىنە اينالدى. ال بالقاشتىڭ تۇنگى اسپانىن جارقىراتقان مەرەكەلىك وتشاشۋ فەستيۆالدى اسەرلى قورىتىندىلادى.
الايدا فەستيۆال تاريحى مۇنىمەن اياقتالمايدى.
ۇيىمداستىرۋشىلار الداعى ۋاقىتتا Balkhash Tour Fest – 2027 فەستيۆالىنە دايىندىق جۇمىستارىن باستاماق.
سونىمەن قاتار فەستيۆال وتكەن الاڭ جاز بويى بوس تۇرمايدى. دەمالىس كۇندەرى مۇندا كونتسەرتتەر، ديسكوتەكالار، كورمەلەر، وتباسىلىق مەرەكەلەر جانە باسقا دا بۇقارالىق ءىس-شارالار ۇيىمداستىرىلادى. بۇل باستاما قالا تۇرعىندارىنىڭ بوس ۋاقىتىن مازمۇندى وتكىزۋىنە مۇمكىندىك بەرىپ قانا قويماي، بالقاشقا كەلەتىن تۋريستەردىڭ دەمالىسىن ودان ءارى قىزىقتى ەتە تۇسپەك.
بۇگىندە بالقاش تەك جاعاجاي تۋريزمىمەن شەكتەلمەيدى. فەستيۆال اياسىندا جۇمىس ىستەگەن تۋروپەراتورلار پاۆيلونىندا بالقاش ءوڭىرى بويىنشا جاڭا تۋريستىك باعىتتار تانىستىرىلدى. سولاردىڭ ءبىرى ءوڭىردىڭ تابيعي جاۋھارى سانالاتىن توراڭعى توعايلارىنا ارنالدى.
بۇگىندە Balkhash Tour Fest جاي عانا جازعى مەرەكە ەمەس. ول – بالقاش ءوڭىرىنىڭ تۋريستىك الەۋەتىن ارتتىرۋعا، ءوڭىردىڭ تارتىمدىلىعىن كۇشەيتۋگە جانە ىشكى ءتۋريزمدى جۇيەلى تۇردە دامىتۋعا باعىتتالعان ماڭىزدى جوبالاردىڭ بىرىنە اينالدى.
