ءبىلىم بەرۋ – ەل بولاشاعىنىڭ نەگىزى. ءار وڭىردەگى ءبىلىم سالاسىنىڭ دامۋ قارقىنى – قازاقستاننىڭ ينتەللەكتۋالدىق الەۋەتىنىڭ ايعاعى. مەملەكەت باسشىسى قاسىم-جومارت توقاەۆتىڭ «ادىلەتتى قازاقستان» يدەياسىن جۇزەگە اسىرۋ جولىندا ساپالى ءبىلىم بەرۋدى قامتاماسىز ەتۋ – باستى مىندەتتەردىڭ ءبىرى. وسى رەتتە باتىس قازاقستان وبلىسىندا اتقارىلىپ جاتقان جۇمىستار از ەمەس.وبلىستاعى مەكتەپكە دەيىنگى ۇيىمداردىڭ جاعدايى قانداي؟ جاڭا وقۋ جىلىنا دايىندىق قالاي ءجۇرىپ جاتىر؟ «كەلەشەك مەكتەبى» جوباسى اياسىندا قانداي وزگەرىستەر بار؟ «ادىرنا» ءتىلشىسى وسى جانە وزگە دە سۇراقتارعا جاۋاپ الىپ ءۇشىن باتىس قازاقستان وبلىستىق ءبىلىم باسقارماسىنىڭ باسشىسى ەلدوس سافۋللينمەن ارنايى سۇحباتتاسقان ەدىك.
— ەلدوس نابيوللاۇلى، باتىس قازاقستان وبلىسىنداعى مەكتەپكە دەيىنگى ۇيىمداردىڭ بۇگىنگى جاعدايى قانداي؟
— بۇگىندە وبلىس بويىنشا 562 مەكتەپكە دەيىنگى ۇيىم جۇمىس ىستەيدى. ونىڭ 382-ءسى مەملەكەتتىك، 180-ءى جەكە مەنشىك. جالپى 34 مىڭعا جۋىق بالا مەكتەپكە دەيىنگى تاربيە مەن بىلىممەن قامتىلعان. بارلىق بالاباقشادا اعىمداعى جوندەۋ جۇمىستارى اياقتالدى.
— باسشىلىق قىزمەتتەردە كادر تاپشىلىعى بايقالا ما؟
— ءيا، قازىرگى ۋاقىتتا 26 مەكتەپكە دەيىنگى ۇيىمدا باسشىلىق قىزمەت بوس، كونكۋرستىق ىرىكتەۋ جۇمىستارى جۇرگىزىلۋدە. بۇل — ۋاقىتشا جاعداي، ءتيىستى كادرلىق جۇمىستار جۇيەلى اتقارىلىپ جاتىر.
— سوڭعى ۋاقىتتا ەل اۋقىمىندا جۇزەگە اسىپ جاتقان «كەلەشەك مەكتەپتەرى» جوباسىنىڭ بقو-داعى احۋالى تۋرالى ايتساڭىز.
— وبلىستا 3 “كەلەشەك مەكتەبى” پايدالانۋعا بەرىلدى. بۇل – ءبىلىم ساپاسىنا، ينفراقۇرىلىمعا ۇلكەن سەرپىن بەرەتىن قادام. جاڭا مەكتەپتەردىڭ ديرەكتورلارى “1000 كوشباسشى” جوباسىنىڭ كادر رەزەرۆىنەن تاعايىندالدى. ولاردىڭ ورىنباسارى لاۋازىمىنا 10 پەداگوگ تاعايىندالدى: 5-ەۋى – اۋىسۋ، 4-ەۋى – كونكۋرستىق نەگىزدە، 1-ەۋى – “1000 كوشباسشى” جوباسى ارقىلى جاڭا قىزمەتكە كەلدى. قازىرگى ۋاقىتتا جالپى 258 پەداگوگ جۇمىسقا قابىلداندى، ونىڭ ىشىندە 228 – اۋىسۋ تارتىبىمەن، 30 – كونكۋرستىق جولمەن.
— وسى جىلى تاعى قانشا مەكتەپتىڭ قۇرىلىسىن اياقتاۋ كوزدەلىپ وتىر؟
— «كەلەشەك مەكتەپتەرى» ۇلتتىق جوباسى اياسىندا 8100 ورىندىق 9 مەكتەپتىڭ قۇرىلىسى جوسپارلانعان. ونىڭ ىشىندە 3 مەكتەپ پايدالانۋعا بەرىلدى، ناتيجەسىندە ءۇش اۋىسىمدىق ءبىلىم بەرۋ ماسەلەسى شەشىمىن تاپتى. قالعان 3 مەكتەپتىڭ قۇرىلىسى 1 قىركۇيەككە دەيىن اياقتالادى دەپ جوسپارلانىپ وتىر.
— جاڭا وقۋ جىلىندا وقۋشىلار سانى قانداي بولادى?
— 2025-2026 وقۋ جىلىندا بولجام بويىنشا وبلىستا 126,9 مىڭ وقۋشى ءبىلىم الادى. ال وتكەن وقۋ جىلىندا بۇل كورسەتكىش 124,9 مىڭدى قۇراعان ەدى. 1-سىنىپقا 11569 وقۋشى قابىلدانادى دەپ جوسپارلانعان، بۇگىنگە دەيىن 10299 بالا قابىلداندى، ولاردىڭ 76,4%-ى قازاق تىلىندە ءبىلىم الۋعا نيەت بىلدىرگەن. سونىمەن قاتار 10-سىنىپقا 7218 وقۋشى قابىلداۋ جوسپارلاندى، قازىرگى تاڭدا 2187 وقۋشى قابىلداندى، ونىڭ ىشىندە 52%-ى قازاق تىلىندە وقيدى.
— جەتەكشىلىك لاۋازىمدارعا تاعايىنداۋ قالاي ءجۇرىپ جاتىر؟
— وبلىستا 367 مەملەكەتتىك مەكتەپ قىزمەت اتقارادى. قازىرگى كەزدە 297 مەكتەپتىڭ ديرەكتورى بار، 22 مەكتەپكە باسشى قاجەت، ولار تامىز ايىندا كونكۋرس ارقىلى تاعايىندالادى.
— مەملەكەت باسشىسىنىڭ تاپسىرماسىن ورىنداۋ ماقساتىندا كۇردەلى جوندەۋ جۇمىستارى قالاي جۇرگىزىلۋدە؟
— 2025-2027 جىلدار ارالىعىندا 86 مەكتەپكە كۇردەلى جوندەۋ جۇمىستارى جۇرگىزىلەدى. ونىڭ ىشىندە:
•2025 جىلى – 6 مەكتەپ
•2026 جىلى – 33 مەكتەپ
•2027 جىلى – 47 مەكتەپ
جالپى جوندەۋ جۇمىستارىنا بولىنگەن سوما — 96,3 ملرد تەڭگە.
— ءبىلىم ينفراقۇرىلىمىن جاڭارتۋ جۇمىستارى قانداي دەڭگەيدە؟
— بۇگىندە «كەلەشەك مەكتەبى» ۇلتتىق جوباسى اياسىندا 9 مەكتەپ سالىنۋدا. ونىڭ 3-ەۋى پايدالانۋعا بەرىلدى:
•ورال قالاسىنداعى دەركول كەنتىندە №51 مەكتەپ (1500 ورىن)
•بالاۋسا شاعىناۋدانىندا №52 مەكتەپ (1500 ورىن)
•تەرەكتى اۋدانى پودستەپنوە اۋىلىندا 1200 ورىندىق مەكتەپ
سونىمەن قاتار، ورال قالاسىندا №31 مەكتەپ (400 ورىن) اپاتتى مەكتەپتىڭ ورنىنا بوي كوتەردى. قازتالوۆ اۋدانىندا “قونىس” مەكتەبى (60 ورىن) جانە №8 دارىندى بالالارعا ارنالعان مەكتەپ-ليتسەيىنىڭ قۇرىلىسى ءجۇرىپ جاتىر.
— اعىمداعى جوندەۋ جۇمىستارىنا قانشا قاراجات ءبولىندى؟
— اعىمداعى جوندەۋ جۇمىستارىنا باسا نازار اۋداردىق. اتاپ ايتساق، 326 مەكتەپكە – 428,8 ملن تەڭگە، 79 بالاباقشاعا – 167,9 ملن تەڭگە، 24 كوللەدجگە – 47,4 ملن تەڭگە ءبولىندى. بۇل جۇمىستار تامىز-قىركۇيەك ايلارىندا تولىق اياقتالادى دەپ جوسپارلانىپ وتىر.
— ءسوز سوڭىندا وبلىس تۇرعىندارىنا قانداي تىلەك ايتاسىز؟
— ساناۋلى كۇندەردەن سوڭ جاڭا وقۋ جىلى باستالادى. ءبىلىم ساپاسى مەن ونىڭ قولجەتىمدىلىگىن ارتتىرۋ ءۇشىن جۇيەلى جۇمىستار لەگى جالعاسادى دەپ ۋادە بەرەمىن. بالالارىمىزدىڭ ساپالى ءبىلىم مەن تاربيەلى ورتادا ءوسۋى – باستى ماقساتىمىز. وبلىس تۇرعىندارىنا زور دەنساۋلىق، جاڭا وقۋ جىلىندا جەتىستىكتەر تىلەيمىن!
— سۇحباتىڭىزعا كوپ راقمەت!
