اقمولا وبلىسىندا اۋداندا عانا ەمەس، وڭىردە دە تەڭدەسى جوق زاماناۋي ءسۇت-تاۋارلى فەرما سالىنىپ جاتىر. جوبانى «باستاۋ» جشس جەرگىلىكتى اكىمدىكپەن بىرلەسىپ جۇزەگە اسىرۋدا.
حالقى نەبارى 500-گە جۋىق بۇل اۋىل ءۇشىن ءىرى فەرمانىڭ سالىنۋى ۇلكەن قۋانىش. قازىرگى ۋاقىتتا قۇرىلىس قارقىنى جوعارى. اۋماعى 5 070 شارشى مەتر بولاتىن ەكىنشى قوراداعى جۇمىس تولىعىمەن بىتۋگە تاياۋ. ساۋ جانە ءسۇت وڭدەۋ بلوگىندا دا مونتاجشىلار دامىلسىز ەڭبەك ەتۋدە. فەرما باسشىسى، «باستاۋ» جشس ديرەكتورى دانيار مۇقىشەۆ بىزگە جوبانىڭ بارىسىن تانىستىرىپ، الداعى جوسپارلارىمەن ءبولىستى:
«قۇرىلىستى كوكتەمدە باستادىق. مۇنىڭ ءبارى مەملەكەت تاراپىنان 2,5% مولشەرلەمەمەن 10 جىلعا بەرىلگەن جەڭىلدەتىلگەن نەسيە ارقاسىندا مۇمكىن بولدى. جوبالىق قۋاتىمىز – 1200 ساۋىندى سيىر. كۇزدە تەحنيكالىق ىسكە قوسۋدى، ال تولىق اياقتالۋىن كەلەسى جىلدىڭ شىلدەسىنە جوسپارلاپ وتىرمىز»، – دەدى ول.
جوبا اياسىندا گەرمانيادان 918 گولشتينو-فريز تۇقىمدى ءىرى قارا جەتكىزىلەدى. ونىڭ ىشىندە 768-ءى – ساۋىندى سيىر، قالعانى – سۋالعان. مالدار شامامەن 200 باستان پارتيامەن اكەلىنىپ، تولدەۋ پروتسەسى بىركەلكى ءجۇرۋ ءۇشىن جاسى 22-26 اي ارالىعىندا بولادى.
«فەرما ىسكە قوسىلعاندا 40-50 جەرگىلىكتى تۇرعىن تۇراقتى جۇمىسپەن قامتىلادى. ال نەگىزگى تەحنولوگيالىق مامانداردىڭ ءبىر بولىگى شەتەلدەن تارتىلادى. ساۋ پروتسەسى نيدەرلاندىنىڭ ايگىلى GEA زاۋىتىنىڭ زاماناۋي قوندىرعىلارىمەن اۆتوماتتاندىرىلادى»، – دەپ اتاپ ءوتتى سەرىكتەستىك باسشىسى.
اۋىل تۇرعىندارى بۇل جاڭالىقتى قۋانىشپەن قابىلداپ وتىر. سەبەبى باستاۋ سياقتى شاعىن ەلدى مەكەن ءۇشىن مۇنداي اۋقىمدى جوبا تەك جاڭا جۇمىس ورىندارى عانا ەمەس، اۋىلدىڭ بولاشاعىنا دەگەن سەنىمنىڭ ارتۋى.
فەرما تولىق ىسكە قوسىلعاندا، وڭىردەگى ءسۇت تاپشىلىعى ايتارلىقتاي ازايىپ، يمپورتتىق ءونىمنىڭ ورنىن وتاندىق ساپالى ءونىم باسادى. بۇل تەك ءبىر اۋىلدىڭ عانا ەمەس، بۇكىل وبلىستىڭ ازىق-تۇلىك قاۋىپسىزدىگىنە قوسىلعان زور ۇلەس بولماق.
