Aqmola oblysynda audanda ǧana emes, öŋırde de teŋdesı joq zamanaui süt-tauarly ferma salynyp jatyr. Jobany «Bastau» JŞS jergılıktı äkımdıkpen bırlesıp jüzege asyruda.
Halqy nebärı 500-ge juyq būl auyl üşın ırı fermanyŋ salynuy ülken quanyş. Qazırgı uaqytta qūrylys qarqyny joǧary. Aumaǧy 5 070 şarşy metr bolatyn ekınşı qoradaǧy jūmys tolyǧymen bıtuge taiau. Sauu jäne süt öŋdeu blogynda da montajşylar damylsyz eŋbek etude. Ferma basşysy, «Bastau» JŞS direktory Daniiar Mūqyşev bızge jobanyŋ barysyn tanystyryp, aldaǧy josparlarymen bölıstı:
«Qūrylysty köktemde bastadyq. Mūnyŋ bärı memleket tarapynan 2,5% mölşerlememen 10 jylǧa berılgen jeŋıldetılgen nesie arqasynda mümkın boldy. Jobalyq quatymyz – 1200 sauyndy siyr. Küzde tehnikalyq ıske qosudy, al tolyq aiaqtaluyn kelesı jyldyŋ şıldesıne josparlap otyrmyz», – dedı ol.
Joba aiasynda Germaniiadan 918 golştino-friz tūqymdy ırı qara jetkızıledı. Onyŋ ışınde 768-ı – sauyndy siyr, qalǧany – sualǧan. Maldar şamamen 200 bastan partiiamen äkelınıp, töldeu prosesı bırkelkı jüru üşın jasy 22-26 ai aralyǧynda bolady.
«Ferma ıske qosylǧanda 40-50 jergılıktı tūrǧyn tūraqty jūmyspen qamtylady. Al negızgı tehnologiialyq mamandardyŋ bır bölıgı şetelden tartylady. Sauu prosesı Niderlandynyŋ äigılı GEA zauytynyŋ zamanaui qondyrǧylarymen avtomattandyrylady», – dep atap öttı serıktestık basşysy.
Auyl tūrǧyndary būl jaŋalyqty quanyşpen qabyldap otyr. Sebebı Bastau siiaqty şaǧyn eldı meken üşın mūndai auqymdy joba tek jaŋa jūmys oryndary ǧana emes, auyldyŋ bolaşaǧyna degen senımnıŋ artuy.
Ferma tolyq ıske qosylǧanda, öŋırdegı süt tapşylyǧy aitarlyqtai azaiyp, importtyq önımnıŋ ornyn otandyq sapaly önım basady. Būl tek bır auyldyŋ ǧana emes, bükıl oblystyŋ azyq-tülık qauıpsızdıgıne qosylǧan zor üles bolmaq.
