ۋكراينا پرەزيدەنتى ۆلاديمير زەلەنسكي رەسەي باسشىسى ۆلاديمير ءپۋتيننىڭ ماسكەۋدە كەزدەسۋگە قاتىستى مالىمدەمەسىنە پىكىر ءبىلدىردى. بۇل تاقىرىپتى زەلەنسكي فرانتسيا پرەزيدەنتى ەممانۋەل ماكرونمەن بىرگە پاريجدە وتكىزگەن بىرلەسكەن ءباسپاسوز كونفەرەنتسياسىندا قوزعادى، دەپ حابارلايدى “ادىرنا”.
«مەنىڭشە، مەنى ماسكەۋگە شاقىرعانىنا قاراعاندا كەزدەسۋدى قالامايدى. رەسەي كەزدەسۋدى ايتا باستادى – بۇل جامان ەمەس. بىراق ءبىز ولاردىڭ سوعىستى توقتاتۋعا دەگەن نيەتىن ازىرگە كورىپ وتىرعان جوقپىز»، — دەپ كەلتىرەدى زەلەنسكيدىڭ ءسوزىن BBC-News.
بۇعان دەيىن پۋتين قىتايعا ساپارى بارىسىندا زەلەنسكيمەن ماسكەۋدە كەزدەسۋى مۇمكىن ەكەنىن ايتقان بولاتىن. الايدا ول مۇنداي ديالوگتىڭ قاجەت ەكەنىنە كۇمان ءبىلدىرىپ، ۋكراينا باسشىسىنىڭ زاڭدىلىعىنا (لەگيتيمدىگىنە) تاعى دا كۇمان كەلتىردى.
سونداي-اق رەسەي پرەزيدەنتى مۇنداي كەزدەسۋ تۋرالى ءوتىنىش اق ءۇي باسشىسى دونالد ترامپتان تۇسكەنىن راستادى. باق دەرەكتەرىنە قاراعاندا، بۇل سۇحبات ۆاشينگتوندا ۋكراينا مەن ەۋروپا ەلدەرىنىڭ قاتىسۋىمەن وتكەن سامميتتە بولعان.
كەيىن اقش پرەزيدەنتى دونالد ترامپ جۋرناليستەرگە بەرگەن سۇحباتىندا پۋتين مەن زەلەنسكي ازىرگە قاقتىعىستى رەتتەۋ بويىنشا كەلىسسوزدەر وتكىزۋگە دايىن ەمەس ەكەنىن ايتتى.
سونىمەن قاتار، ترامپ زەلەنسكيمەن جانە ءدال سول ۋاقىتتا پاريجدە جينالعان ەۋروپالىق كوشباسشىلارمەن تەلەفون ارقىلى سويلەسكەن. ولار «قالاۋشىلار كواليتسياسى» كەزدەسۋىنە قاتىسىپ جاتقان بولاتىن.
كەزدەسۋدەن كەيىنگى ءباسپاسوز ءماسليحاتىندا ماكرون 26 ەلدىڭ ۋكراينا اۋماعىنا ءوز كۇشتەرىن جىبەرۋگە دايىن ەكەنىن ايتتى — بىراق تەك وق اتۋدى توقتاتۋ تۋرالى كەلىسىم جاسالعان جاعدايدا عانا.
