فوتو س سايتا apecs-s.com
جوگوركۋ كەنەش (قىرعىزستان پارلامەنتى) «الپينيزم تۋرالى» زاڭ جوباسىن قوعامدىق تالقىلاۋعا شىعاردى. قۇجاتتا بيىكتىگى 6000 مەتردەن اساتىن تاۋلارعا شىعۋ ءۇشىن ارنايى تولەم ەنگىزۋ ۇسىنىلعان. بۇل تۋرالى Sport اكيpress جاريالادى، دەپ حابارلايدى “ادىرنا”.
جوباعا سايكەس، 6000 مەتردەن جوعارى شىڭدارعا شىعۋعا نيەتتى بارلىق الپينيستەر ارنايى رۇقساتناما (پەرميت) الۋعا مىندەتتى بولادى. بۇل قۇجاتتىڭ قۇنى، قانداي تاۋلى ايماقتارعا قولدانىلاتىنى جانە رۇقساتناما بەرۋ ءتارتىبى قىرعىزستان مينيسترلەر كابينەتى تاراپىنان رەتتەلەدى.
سونىمەن قاتار، زاڭ جوباسىندا الپينيستەردى مىندەتتى تۇردە ساقتاندىرۋ، ەرەجەلەردى بۇزعاندارعا قاتىستى جاۋاپكەرشىلىكتى قاتاڭداتۋ جانە شىڭعا شىعۋ قاۋىپسىزدىگىن قامتاماسىز ەتۋ شارالارى قاراستىرىلعان. جەكەلەگەن بولىمدە ەكولوگيالىق تالاپتار دا كورسەتىلگەن: ەكسپەديتسياعا قاتىسۋشىلار قالدىقتاردى ارنايى قاپتار مەن كونتەينەرلەرگە جيناپ، ولاردى تومەنگە ءتۇسىرىپ، جويۋى ءتيىس.
بۇل باستامانىڭ اۆتورى — ء«بۇتىن قىرعىزستان» پارتياسىنىڭ دەپۋتاتى ەميل توكتوشەۆ. ونىڭ ايتۋىنشا، زاڭ جوباسى گيدتەر، نۇسقاۋشىلار، الپينيزم كلۋبتارى مەن تۋريستىك كومپانيالاردىڭ قىزمەتىن رەتتەپ، ينفراقۇرىلىمدى دامىتۋعا جانە الپينيزم سالاسىنداعى حالىقارالىق ىنتىماقتاستىقتى كەڭەيتۋگە باعىتتالعان. ول تاۋلى ايماقتاردا قاۋىپسىزدىكتى جۇيەلى تۇردە قامتاماسىز ەتۋدىڭ ماڭىزدىلىعىن اتاپ ءوتتى.
زاڭ جوباسى ورىس ءالپينيسى ناتاليا ناگوۆيتسينامەن بولعان قايعىلى وقيعا اياسىندا ازىرلەندى. ول پوبەدا شىڭىندا (تيان-شانداعى ەڭ بيىك نۇكتە، 7439 م) اياعىن سىندىرىپ، تومەن تۇسە الماي قالعان. قىرعىزستاندىق جانە شەتەلدىك مامانداردى تارتقان قۇتقارۋ وپەراتسياسى مەن تىكۇشاق قولدانىلعانىنا قاراماستان، ونى قۇتقارۋ مۇمكىن بولمادى.
بۇل وقيعا قوعام مەن الپينيزم سالاسىنداعى كاسىبي قاۋىمداستىقتا كەڭ تالقىلاۋعا ۇلاسىپ، ورتالىق ازياداعى قۇتقارۋ جۇيەلەرىنىڭ ۇيىمداستىرىلۋى، قاۋىپسىزدىك ستاندارتتارىنىڭ سەنىمدىلىگى جانە ءوڭىر ەلدەرىنىڭ ءوزارا ءىس-قيمىلىنىڭ تيىمدىلىگى تۋرالى ماسەلە كوتەردى.
