قازاقستان جاقىن ارادا مۇناي ءوندىرۋ كولەمىن جىلىنا 100 ميلليون تونناعا جەتكىزۋدى جوسپارلاپ وتىر. بۇل تۋرالى ەل پرەزيدەنتى قاسىم-جومارت توقاەۆ مالىمدەدى، دەپ حابارلايدى “ادىرنا”.
«بەلگىلى بولعانداي، مۇناي مەن گاز – ءبىزدىڭ ستراتەگيالىق ماڭىزدى رەسۋرستارىمىز. مۇناي سالاسى ەلدىڭ دامۋىنا ەرەكشە ۇلەس قوستى. تاۋەلسىزدىك جىلدارىندا ءبىز «قارا التىننىڭ» قۇندىلىعىن تولىق سەزىندىك. بۇگىنگى تاڭدا بۇل سالا قارقىندى دامىپ كەلەدى. قازاقستان الەمدىك مۇناي نارىعىندا كوشباسشى ەلدەردىڭ قاتارىندا. ەلىمىزدە مۇناي ءوندىرۋ كولەمى ءتورت ەسە ارتتى جانە جاقىن ارادا جىلىنا 100 ميلليون تونناعا جەتەدى»، – دەدى مەملەكەت باسشىسى.
توقاەۆتىڭ ايتۋىنشا، كومىرسۋتەكتەر ءالى دە الەمدىك ەنەرگەتيكادا، سونىڭ ىشىندە قازاقستان ەنەرگەتيكاسىندا باستى ءرول اتقارا بەرەدى.
«بىرقاتار ەلدەردىڭ، سونىڭ ىشىندە ەۋروپا ەلدەرىنىڭ تاجىريبەسى كورسەتىپ وتىرعانداي، بالامالى ەنەرگيا كوزدەرى قوسالقى قىزمەت اتقارا الادى»، – دەدى ول مۇنايشىلار كۇنى قارساڭىندا وتكەن سالتاناتتى جيىندا مۇناي سالاسى قىزمەتكەرلەرىن قۇتتىقتاي وتىرىپ.
پرەزيدەنتتىڭ ايتۋىنشا، وتاندىق مۇناي-گاز كەشەنى الدىندا تۇرعان ماڭىزدى مىندەتتەردىڭ ءبىرى – تەحنولوگيالىق جاڭعىرتۋ، سونىڭ ىشىندە جاساندى ينتەللەكتىنى ەنگىزۋ.
«زاماناۋي تەحنولوگيالار مۇناي مەن مۇناي ونىمدەرىن ءوندىرۋدى، تاسىمالداۋدى جانە وڭدەۋدى وڭتايلاندىرۋعا ىقپال ەتۋى كەرەك. وتاندىق مۇناي-گاز يندۋسترياسى قازىرگى زامان تالاپتارىنا ساي بولۋى ءتيىس. سالاعا ەكولوگيالىق تازا ءارى وزىق تەحنولوگيالاردى ەنگىزۋ اسا ماڭىزدى. گەولوگيالىق بارلاۋ جۇمىستارىن جانداندىرىپ، جاڭا كەن ورىندارىن اشۋعا باسا نازار اۋدارۋ قاجەت»، – دەدى ول.
سونىمەن قاتار، مەملەكەت باسشىسى مۇناي-گاز سالاسىن ءارى قاراي دامىتۋ ءۇشىن بىلىكتى كادرلار دايارلاۋدىڭ ماڭىزدىلىعىن اتاپ ءوتتى. ونىڭ ايتۋىنشا، بۇگىندە قازاقستاننىڭ مۇناي-گاز سالاسىندا 200 مىڭنان استام ادام ەڭبەك ەتەدى.
