2024 جىلى شەتەلدىك ءبىلىم بەرۋ ۇيىمدارىنان شاكىرتاقى العان قازاقستاندىق ستۋدەنتتەر دەكلاراتسيا تاپسىرىپ، تابىسىنىڭ 10 پايىزىن جەكە تابىس سالىعى رەتىندە تولەۋى كەرەك، دەپ حابارلايدى "ادىرنا" ۇلتتىق پورتالى.
مەملەكەتتىك كىرىستەر كوميتەتىنىڭ مالىمەتىنشە، شاكىرتاقى كولەمى “كىرىستەر مەن مۇلىك تۋرالى” دەكلاراتسيادا كورسەتىلۋى ءتيىس. ال "بولاشاق" باعدارلاماسى سياقتى مەملەكەتتىك قولداۋ اياسىندا بەرىلەتىن شاكىرتاقىلار سالىقتان بوساتىلادى.
“سالىق سالۋدان بوساتىلاتىن شاكىرتاقىلاردىڭ جەكە ساناتتارى بار. بۇل – قازاقستاننىڭ ءبىلىم بەرۋ ۇيىمدارى ۇسىنعان، سونداي-اق "بولاشاق" سەكىلدى ارنايى مەملەكەتتىك باعدارلامالار اياسىندا تاعايىندالعان شاكىرتاقىلار”، – دەدى سالىق ادىستەمەسى باسقارماسى باسشىسىنىڭ ورىنباسارى ايگۇل ابباسوۆا.
ايتا كەتەيىك، 2026 جىلدان باستاپ جاڭا سالىق كودەكسىنە سايكەس شەتەلدىك قارجى كوزدەرىنەن شاكىرتاقى الاتىن ستۋدەنتتەرگە سالىق سالىنبايدى.
