قازگيدرومەت 29 قىركۇيەك كۇنى قازاقستاننىڭ باسىم اۋماعىندا قولايسىز اۋا رايى بولاتىنىن حابارلادى، دەپ حابارلايدى “ادىرنا”.
مالىمەتكە سۇيەنسەك، ەلدىڭ بىرقاتار وڭىرىندە قار ارالاس جاڭبىر، نايزاعاي، بۇرشاق، ۇسىك پەن قاتتى جەل كۇتىلەدى.
استانادا تۇندە جانە تاڭەرتەڭ تۇمان ءتۇسىپ، –1…–3 °C دەيىن ۇسىك جۇرەدى.
الماتى وبلىسى مەن قوناەۆتا، سونداي-اق جەتىسۋ مەن جامبىلدا نايزاعاي ويناپ، جەلدىڭ جىلدامدىعى 15–20 م/س-قا دەيىن كۇشەيەدى. قاراعاندى وبلىسىندا تۇندە قار ارالاس جاڭبىر جاۋىپ، كەي جەرلەردە تۇمان بولادى.
باتىس قازاقستان وبلىسىندا –3 °C دەيىن ۇسىك بايقالۋى مۇمكىن. ال قوستانايدا قار ارالاس جاڭبىر جاۋىپ، كوكتايعاق كۇتىلەدى. شىعىس قازاقستان مەن اباي وبلىستارىندا قاتتى جاۋىن-شاشىن، نايزاعاي، بۇرشاق پەن داۋىل بولجانىپ وتىر.
ماڭعىستاۋ، اتىراۋ، قىزىلوردا، جامبىل جانە تاعى بىرنەشە وڭىردە ءورت قاۋپى وتە جوعارى دەڭگەيدە ساقتالادى.
ماماندار تۇرعىندارعا جىلى كيىنىپ، جولعا شىققاندا اباي بولۋدى، نايزاعاي كەزىندە اشىق الاڭداردان اۋلاق ءجۇرۋدى جانە كولىك جۇرگىزۋشىلەرىنە كوكتايعاق كەزىندە بارىنشا ساقتىق شارالارىن ۇستانۋدى ەسكەرتتى.
