ۋكراينانىڭ حەرسون وبلىسىنداعى رەسەي باقىلاۋىنداعى الەشكي قالاسىندا گۋمانيتارلىق ميسسيا اياقتالدى، دەپ حابارلايدى “ادىرنا”.
قالا تۇرعىندارىن ەۆاكۋاتسيالاۋ كەزىندە 750 ادام قاۋىپسىز جەرگە كوشىرىلدى.
رەسەيدىڭ ادام قۇقىقتارى جونىندەگى ۋاكىلى يانا لانتراتوۆانىڭ مالىمدەۋىنشە، ەۆاكۋاتسيا 30 قازاندا اياقتالعان. ونىڭ ايتۋىنشا، ۋكراينا باقىلاۋىنداعى اۋماققا ورالعىسى كەلگەن تۇرعىندارعا وسىنداي مۇمكىندىك جاسالعان.
ۋكراينا جوعارعى راداسىنىڭ دەپۋتاتى داۆيد اراحاميانىڭ حابارلاۋىنشا، ەۆاكۋاتسيالانعان ازاماتتار مەن ۋكراينالىق دەلەگاتسيا الدىمەن رەسەيدىڭ اناپا قالاسىنا جەتكىزىلگەن. ودان كەيىن ولار ۇشاقپەن بەلارۋسكە، ال ودان ءارى اۆتوبۋسپەن ۋكراينا اۋماعىنا ورالادى.
اقش-تىڭ ءبىرىنشى حانىمى مەلانيا ترامپ الەۋمەتتىك جەلىدەگى پاراقشاسىندا 25 اۆتوبۋسپەن 750 ادام ەۆاكۋاتسيالانعانىن جازدى. ۋكراينا ومبۋدسمەنى دميتري لۋبينەتس مۇنداي گۋمانيتارلىق ميسسيالار الداعى ۋاقىتتا دا جالعاسادى دەگەن ءۇمىت ءبىلدىردى.
الەشكي — دنەپر وزەنىنىڭ سول جاعالاۋىندا ورنالاسقان، رەسەي اسكەرى باسىپ العان قالا. سوعىسقا دەيىن مۇندا شامامەن 24 مىڭ ادام تۇرعان. قازىر قالادا 1 700–2 000 تۇرعىن قالعانى ايتىلادى. ولاردىڭ اراسىندا بالالار دا بار.
2023 جىلعى ماۋسىمدا كاحوۆكا سۋ ەلەكتر ستانتسياسىنىڭ قيراۋىنان كەيىن قالا اۋماعىن سۋ باسىپ، ينفراقۇرىلىمعا ايتارلىقتاي زيان كەلگەن. سونىڭ سالدارىنان اۋىزسۋ مەن ازىق-تۇلىك تاپشىلىعى كۇشەيگەن. سوڭعى ايلاردا قالادا گۋمانيتارلىق داعدارىس ۋشىعىپ، تۇرعىنداردىڭ كۇندەلىكتى تىرشىلىگى قيىنداعان.
