اقش پرەزيدەنتى دونالد ترامپ ورمۋز بۇعازىن جاقىن ارادا اقش اۋماعى دەپ جاريالاۋ مۇمكىن. ول بۇل تۋرالى لونگ-ايلەندتەگى پوليتسيا اكادەمياسىندا سويلەگەن سوزىندە ايتتى، دەپ حابارلايدى "ادىرنا".
ترامپتىڭ سوزىنشە، اقش يرانعا قارسى اسكەري وپەراتسيانى اياقتاعاننان كەيىن بۇعازعا قاتىستى وسىنداي شەشىم قابىلداۋى ىقتيمال.
«يراندى تالقانداۋدى اياقتاعاننان كەيىن، مەن جاقىن ارادا ورمۋز بۇعازىن اقش اۋماعى دەپ جاريالايمىن. نەگىزىندە، ول قازىردىڭ وزىندە سولاي. ءبىز بۇعازعا بلوكادا قويدىق. ەگەر قالاماساق، ەشبىر كەمە بۇعازدان وتە المايدى»، – دەدى ترامپ.
ورمۋز بۇعازى الەمدىك ەنەرگەتيكا نارىعى ءۇشىن اسا ماڭىزدى ستراتەگيالىق تەڭىز جولى سانالادى. الەمدە تەڭىز ارقىلى تاسىمالداناتىن مۇنايدىڭ شامامەن بەستەن ءبىر بولىگى وسى بۇعاز ارقىلى وتەدى. سوندىقتان ونداعى كەز كەلگەن اسكەري نەمەسە ساياسي شيەلەنىس مۇناي باعاسى مەن جاھاندىق جەتكىزۋ تىزبەگىنە تىكەلەي اسەر ەتۋى مۇمكىن.
الايدا ترامپتىڭ مالىمدەمەسى اقش-تىڭ ناقتى ساياساتىنا اينالا ما، الدە ساياسي مالىمدەمە كۇيىندە قالا ما — ازىرگە بەلگىسىز.
يران تاراپى ۆاشينگتوننىڭ قىسىمىنا كونبەيتىنىن ءبىلدىردى. يران سىرتقى ىستەر ءمينيسترىنىڭ ورىنباسارى قازەم عاريبابادي ورمۋز بۇعازىن اشۋ نەمەسە جابۋ تۋرالى شەشىم تەگەراننىڭ قۇزىرىندا ەكەنىن مالىمدەدى.
ال يران سىرتقى ىستەر ءمينيسترى ابباس اراقچي اقش-پەن كەلىسسوزدەردى قايتا باستاۋ جونىندە ازىرگە ناقتى شەشىم قابىلدانباعانىن ايتتى. ونىڭ پىكىرىنشە، كاتار مەن پاكىستان ارقىلى جۇرگىزىلىپ جاتقان بايلانىستاردى رەسمي كەلىسسوز دەپ اتاۋعا بولمايدى. ال ومانمەن جۇرگىزىلگەن كونسۋلتاتسيالار ورمۋز بۇعازى ارقىلى تەڭىز قاتىناسىن قالپىنا كەلتىرۋ ماسەلەسىنە باعىتتالعان.
بۇعان دەيىن ترامپ اقش بۇعازعا «تولىق باقىلاۋ» ورناتقانىن ايتقان ەدى. دەگەنمەن ورمۋز بۇعازى يران مەن وماننىڭ اراسىنداعى حالىقارالىق ماڭىزى بار تەڭىز جولى بولىپ سانالادى.
اسكەري قاقتىعىس پەن تەڭىز تاسىمالىنا بايلانىستى قيىندىقتار اياسىندا جانارماي باعاسى دا قىمباتتادى. ترامپ امەريكالىقتاردىڭ بەنزين ءۇشىن كوبىرەك تولەپ جاتقانىن مويىنداعانىمەن، يرانعا قارسى جۇرگىزىلىپ جاتقان ساياساتتى اقتايتىنىن جەتكىزدى.
ءوز كەزەگىندە يران اقش-تان ساياساتىن وزگەرتىپ، سوعىس سالدارىنان كەلگەن شىعىندى وتەۋدى، سانكتسيالاردى الىپ تاستاۋدى جانە بۇعاتتالعان يراندىق اكتيۆتەردى بوساتۋدى تالاپ ەتىپ وتىر.
