پولشا استاناسى ۆارشاۆادا كونستيتۋتسيالىق تريبۋنال عيماراتىن پوليتسيا قورشاۋعا الىپ، ونىڭ ماڭىنا نارازىلىق بىلدىرۋشىلەر جينالدى، دەپ حابارلايدى "ادىرنا" ۇلتتىق پورتالى DW-عا سىلتەپ.
بۇعان تريبۋنال سۋدياسى اننا كورۆين-پيوتروۆسكانىڭ ورگان توراعاسى بوگدان سۆەنچكوۆسكي مەن ونىڭ ورىنباسارى بارتولومەي سوحانسكيدى ءبىر ايعا قىزمەتىنەن شەتتەتۋ تۋرالى شەشىمى سەبەپ بولدى. وسى جاعدايدان كەيىن پرەزيدەنت كارول ناۆروتسكي سەنەگالعا ساپارىن توقتاتىپ، پولشاعا شۇعىل ورالدى.
30 قازاندا جاريالانعان شەشىمدە تريبۋنالدىڭ ەكى باسشىسى پارلامەنت 2026 جىلى سايلاعان جاڭا سۋديالاردىڭ سوت وتىرىستارىنا قاتىسۋىنا كەدەرگى كەلتىرگەنى ايتىلعان. اننا كورۆين-پيوتروۆسكا مۇنداي شەشىم قابىلداۋعا 2016 جىلعى زاڭ مۇمكىندىك بەرەتىنىن مالىمدەگەن. سونداي-اق ول 3 قاراشادا تريبۋنال سۋديالارىنىڭ جالپى جينالىسىن وتكىزەتىنىن حابارلاعان.
الايدا تريبۋنالدىڭ X الەۋمەتتىك جەلىسىندەگى پاراقشاسىندا بۇل شەشىمگە قارسىلىق ءبىلدىرىلدى. وندا بوگدان سۆەنچكوۆسكي ءالى دە توراعا، ال بارتولومەي سوحانسكي ونىڭ ورىنباسارى ەكەنى جازىلعان. سونداي-اق جازبا اۆتورلارى اننا كورۆين-پيوتروۆسكانىڭ تريبۋنال سۋدياسى ەمەس ەكەنىن ايتىپ، ونىڭ ارەكەتىن مەملەكەتتىك توڭكەرىس دەپ باعالاعان. كەيىن تريبۋنالدىڭ رەسمي سايتىندا X جەلىسىندەگى بۇل پاراقشانىڭ مەملەكەتتىك ورگانعا قاتىسى جوق ەكەنى حابارلاندى.
قىزمەتىنەن شەتتەتىلگەن ۆيتسە-توراعا بارتولومەي سوحانسكي Rzeczpospolita باسىلىمىنا بەرگەن سۇحباتىندا بۇل شەشىمنەن الدىن الا حابارسىز بولعانىن ايتقان. ونىڭ سوزىنشە، اننا كورۆين-پيوتروۆسكا تەلەفون ارقىلى حابارلاسىپ، ەندى تريبۋنالدى ءوزى باسقاراتىنىن حابارلاعان.
سوحانسكي ءوزىن قىزمەتىنەن شەتتەتۋگە ەشكىمنىڭ قۇقىعى جوق ەكەنىن ايتىپ، بۇل جاعدايدى تريبۋنالدىڭ تاۋەلسىزدىگىنە قول سۇعۋ دەپ باعالاعان. ول مۇنى مەملەكەتتىك توڭكەرىس دەپ تە اتادى. پولشا پرەمەر-ءمينيسترى دونالد تۋسك سۋديانىڭ شەشىمىن قولدادى. ونىڭ ايتۋىنشا، ەلدە زاڭ ۇستەمدىگىن قالپىنا كەلتىرۋ – ۇكىمەتتىڭ باستى مىندەتتەرىنىڭ ءبىرى. پرەمەر-مينيستر بۇل جولدا باتىل شەشىمدەر قابىلداۋ قاجەت ەكەنىن اتاپ ءوتتى.
ال پرەزيدەنت كارول ناۆروتسكي 30 قازاندا سەنەگالعا بارا جاتقان ۇشاعىن كەرى بۇرىپ، پولشاعا ورالدى. ەلگە كەلگەن سوڭ ول قىزمەتىنەن شەتتەتىلگەن توراعا بوگدان سۆەنچكوۆسكيمەن جانە جوعارعى سوتتىڭ ءبىرىنشى توراعاسى زبيگنەۆ كاپينسكيمەن كەزدەستى. كەيىن كاپينسكيمەن بىرگە كونستيتۋتسيالىق تريبۋنال عيماراتىنا كىردى.
بۇل ارەكەت تە جاڭا داۋ تۋعىزدى. اننا كورۆين-پيوتروۆسكا پرەزيدەنتپەن تەك پرەزيدەنت سارايىندا كەزدەسۋگە دايىن ەكەنىن ايتقان. ال پارلامەنت سايلاعان، بىراق پرەزيدەنت ءالى انت قابىلداتپاعان سۋديا ماچەي بەرەك ناۆروتسكيدىڭ تريبۋنال عيماراتىنا كىرۋ ارەكەتىن سىنعا الدى. ونىڭ ايتۋىنشا، پرەزيدەنت وكىلدەرى عيماراتتىڭ كىلتتەرىن الۋعا تىرىسقان.
ۆارشاۆا پوليتسياسىنىڭ حابارلاۋىنشا، ادىلەت ءمينيسترى ءارى باس پروكۋرور ۆالدەمار جۋرەك تريبۋنال عيماراتىنىڭ قاۋىپسىزدىگىن كۇشەيتۋدى سۇراعان. سونىمەن قاتار سۋديالاردىڭ ءبىرى عيماراتتاعى ادامداردىڭ ءومىرى مەن دەنساۋلىعىنا قاۋىپ ءتونۋى مۇمكىن ەكەنىن ەسكەرتكەن.
وسىدان كەيىن پوليتسيا عيماراتتى قورشاۋعا الدى. پوليتسيانىڭ مالىمەتىنشە، نارازىلىق بىلدىرۋشىلەر قۇقىق قورعاۋ قىزمەتكەرلەرىنە قاۋىپتى زاتتار لاقتىرعان. قورشاۋدان اسىپ، عيمارات اۋماعىنا كىرگەن ءۇش ادام ۇستالدى. پوليتسيا قىزمەتكەرلەرى عيماراتتىڭ ىشىنە كىرمەگەن.
پولشاداعى بۇل جاعداي بىرنەشە ايدان بەرى جالعاسىپ كەلە جاتقان ساياسي-قۇقىقتىق داۋدىڭ جالعاسى سانالادى. قايشىلىق پرەمەر-مينيستر دونالد تۋسك باستاعان ۇكىمەت پەن پرەزيدەنت كارول ناۆروتسكيدى قولدايتىن «قۇقىق جانە ادىلەت» پارتياسى اراسىنداعى كەلىسپەۋشىلىكتەن تۋىنداعان.
داۋ پارلامەنتتىڭ جاڭا قۇرامى سايلاعان سۋديالارعا پرەزيدەنتتىڭ انت قابىلداتۋدان باس تارتۋىنان كەيىن كۇشەيدى. كونستيتۋتسيالىق تريبۋنالدىڭ توراعاسى بوگدان سۆەنچكوۆسكي دە جاڭا سۋديالاردىڭ وكىلەتتىگىن مويىنداماي، ولاردىڭ سوت وتىرىستارىنا قاتىسۋىنا رۇقسات بەرمەگەن. ال ۇكىمەت بۇل ارەكەتتى مەملەكەتتىك ورگاننىڭ جۇمىسىنا كەدەرگى كەلتىرۋ دەپ سانايدى.
