پاريج قالاسىندا وتكەن دۇنيەجۇزىلىك جانۋارلار دەنساۋلىعى ۇيىمىنىڭ (WOAH) 93-ءشى باس سەسسياسىندا ۇيىمعا مۇشە 183 ەلدىڭ دەلەگاتتارى قازاقستانعا اۋسىلعا قارسى ۆاكتسيناتسيالانعان تازا ايماق مارتەبەسىن بەرۋ تۋرالى شەشىم قابىلدادى. رەسمي سەرتيفيكات بۇگىن قازاقستان دەلەگاتسياسىنا تابىستالدى.
وسىلايشا، WOAH حالىقارالىق ستاندارتتارىنا سايكەس، ەندى ەلىمىزدىڭ بۇكىل اۋماعى اۋسىل اۋرۋىنان تازا دەپ تانىلدى.
شىعىس جانە ورتالىق ازيا ەلدەرىنىڭ ىشىندە قازاقستان عانا وسىنداي مارتەبەگە يە.
بۇل 2024 جىلدان بەرى ەل ۇكىمەتى جۇرگىزىپ كەلە جاتقان اۋقىمدى ءارى جۇيەلى جۇمىستىڭ ناتيجەسى. مەملەكەتتىڭ ۆەتەريناريالىق جۇيەسىن دايارلاۋ جانە باعالاۋ اياسىندا ەپيزووتيالىق احۋالدى تۇراقتى ساقتاۋ، ۆەتەريناريالىق باقىلاۋدىڭ تيىمدىلىگىن ارتتىرۋ جانە بيولوگيالىق قاۋىپسىزدىك جۇيەسىن جەتىلدىرۋ ماقساتىندا ۆەتەريناريالىق-پروفيلاكتيكالىق، مونيتورينگتىك، ۇيىمداستىرۋشىلىق جانە باقىلاۋ شارالارى كەشەندى قولعا الىندى.
«قازاقستان حالىقارالىق دەڭگەيدە مويىندالعان ەپيزووتيالىق قاۋىپسىزدىك جۇيەسىن دايەكتى تۇردە نىعايتىپ، ۇلتتىق ۆەتەريناريالىق قاۋىپسىزدىكتىڭ دەڭگەيىنىڭ جوعارى ەكەنىن تاعى ءبىر مارتە دالەلدەپ وتىر. بۇگىندە ەلىمىزدىڭ بۇكىل اۋماعى اۋسىلعا قارسى ۆاكتسيناتسيالانعان تازا حالىقارالىق ايماقتارمەن قامتىلدى. بۇل ەل ءۇشىن ۇلكەن جەتىستىك.
سونىمەن قاتار قازاقستان جىل سايىن افريكالىق جىلقى وباسى مەن كلاسسيكالىق شوشقا وباسى بويىنشا دا قاۋىپسىز ەكەنىن دالەلدەپ كەلەدى، سونداي-اق WOAH تالاپتارىنا سايكەس قۇس تۇماۋىنىڭ جوعارى پاتوگەندى ءتۇرى مەن افريكالىق شوشقا وباسىنا قاتىستى وزىندىك دەكلاراتسيالارىن تۇراقتى تۇردە قولداپ وتىر»، – دەدى ايداربەك ساپاروۆ.
ءمينيستردىڭ ايتۋىنشا، بۇل مارتەبە قازاقستاننىڭ حالىقارالىق بەدەلىن نىعايتىپ، شەتەلدىك ساۋدا سەرىكتەستەرىنىڭ سەنىمىن ارتتىرۋعا جانە وتاندىق مال شارۋاشىلىعى ونىمدەرىنىڭ ەكسپورتتىق الەۋەتىن كەڭەيتۋگە جول اشادى.
اتالعا ۇيىمنىڭ 93-ءشى باس سەسسياسى اياسىندا اۋىل شارۋاشىلىعى ءمينيسترى باستاعان قازاقستاندىق دەلەگاتسيا حالىقارالىق ۆەتەريناريا سالاسىنداعى نەگىزگى ماسەلەلەردى تالقىلاۋعا بەلسەندى قاتىستى. اسىرەسە بيولوگيالىق قاۋىپسىزدىك، جانۋارلاردىڭ ترانسشەكارالىق اۋرۋلارىنا قارسى كۇرەس جانە ۆەتەريناريا سالاسىنداعى حالىقارالىق ىنتىماقتاستىق ماسەلەلەرىنە باسا نازار اۋدارىلدى.
سەسسيا اياسىندا ايداربەك ساپاروۆ ۇيىمنىڭ باس ديرەكتورى ەممانۋەل سۋبەيرانمەن كەزدەستى. ول قازاقستان ۆەتەريناريالىق قىزمەتتى دامىتۋدا، WOAH حالىقارالىق ستاندارتتارىن ەنگىزۋدە جانە ورتالىق ازياداعى وڭىرلىك ءوزارا ءىس-قيمىلدى نىعايتۋدا جۇيەلى ءارى دايەكتى ءتاسىل ۇستانىپ وتىرعانىن اتاپ ءوتتى.
ەممانۋەل سۋبەيران ۇيىمعا مۇشە مەملەكەتتەرگە مينيسترلىك دوڭگەلەك ۇستەلى مەن ۇيىمنىڭ باس سەسسياسى اياسىندا قازاقستاننىڭ عىلىمي-دياگنوستيكالىق الەۋەتتى دامىتۋ باعىتىنداعى جۇمىسىن جوعارى باعالاپ، ۆەتەريناريالىق قىزمەتتى جاڭعىرتۋداعى وڭ تاجىريبەنى تانىستىرۋدى ۇسىندى.
ايتا كەتەيىك، ايداربەك ساپاروۆ WOAH مينيسترلىك دوڭگەلەك ۇستەلى مەن باس سەسسياسىندا ءسوز سويلەگەن ورتالىق ازيا ەلدەرى اراسىنداعى جالعىز اۋىل شارۋاشىلىعى ءمينيسترى بولدى.
