ەكونوميكالىق ىنتىماقتاستىق جانە دامۋ ۇيىمى وقىتۋ مەن ءبىلىم بەرۋ سالاسىنداعى حالىقارالىق TALIS-2024 زەرتتەۋىنىڭ ناتيجەلەرىن جاريالادى. زەرتتەۋ قورىتىندىسى قازاقستانداعى ءبىلىم بەرۋ جۇيەسىندەگى وڭ وزگەرىستەردى، ونىڭ ىشىندە پەداگوگتەردى قولداۋعا جانە ءبىلىم ساپاسىن ارتتىرۋعا باعىتتالعان شارالار مەن «پەداگوگ مارتەبەسى تۋرالى» زاڭنىڭ تيىمدىلىگىن كورسەتتى.
TALIS زەرتتەۋى ءبىلىم بەرۋ ورتاسىن، پەداگوگتەردىڭ ەڭبەك جاعدايلارىن، كاسىبي دامۋ مۇمكىندىكتەرىن، وقىتۋ تاجىريبەسى مەن كاسىبي ۇستانىمدارىن باعالايدى. زەرتتەۋگە 7 مىڭنان استام قازاقستاندىق پەداگوگ پەن 369 مەكتەپ ديرەكتورى قاتىستى.
«TALIS – وقۋ ورتاسىن جانە مۇعالىمدەردىڭ ەڭبەك جاعدايلارىن جاقسارتۋعا باعىتتالعان اۋقىمدى حالىقارالىق زەرتتەۋ. 2018 جىلمەن سالىستىرعاندا قازاقستاندىق پەداگوگتەردى اكىمشىلىك جۇمىستارعا تارتۋ ازايىپ، ولار ساباق بەرۋگە جانە اتا-انالارمەن، قامقورشىلارمەن بايلانىسقا كوبىرەك ۋاقىت بولە باستاعان. سونداي-اق ماماندىعىنا جانە ەڭبەك جاعدايىنا قاناعاتتانۋ دەڭگەيى ەداۋىر ارتقان»، – دەپ اتاپ ءوتتى وقۋ-اعارتۋ ءمينيسترى جۇلدىز سۇلەيمەنوۆا.
ودان بولەك، زەرتتەۋ ناتيجەلەرى پەداگوگتەردىڭ ەڭبەك جاعدايىندا ايتارلىقتاي وڭ وزگەرىستەر بولعانىن كورسەتەدى. وتكەن وقۋ جىلىندا قازاقستاندىق پەداگوگتەردىڭ ورتاشا اپتالىق جۇكتەمەسى 36 ساعاتتى قۇرادى. ال 2018 جىلى بۇل كورسەتكىش 50 ساعات بولعان. مۇنداي قىسقارتۋ – ەىدۇ ەلدەرىنىڭ ىشىندە ەرەكشە جاعداي.
سونداي-اق پەداگوگتەردىڭ ورتاشا جاسى 41 جاستى قۇرادى، بۇل ەىدۇ ەلدەرىنىڭ ورتاشا دەڭگەيىنەن 4 جاسقا تومەن. سونىمەن قاتار، جوعارى وقۋ ورنىنان كەيىنگى ءبىلىمى بار پەداگوگتەردىڭ ۇلەسى دە ارتقان. ماگيستر دارەجەسى بار مامانداردىڭ ۇلەسى 3,5 %-دان 11 %-عا دەيىن، ال دوكتور دارەجەسى بارلار 0,1 %-دان 0,6 %-عا دەيىن وسكەن.
ماڭىزدى ناتيجەلەردىڭ تاعى ءبىرى — پەداگوگتەردىڭ ەڭبەك جاعدايلارىنا جانە جالاقىسىنا قاناعاتتانۋشىلىق دەڭگەيىنىڭ كوتەرىلۋى. ساۋالناما ناتيجەلەرى بويىنشا پەداگوگتەردىڭ 95 %-ى ءوز جۇمىسىنا قاناعاتتاناتىنىن، ال 80 %-ى ماماندىقتى قايتا تاڭداۋ مۇمكىندىگى بولسا، قايتادان مۇعالىم بولۋدى قالايتىنىن ايتقان.
