قازاقستاننىڭ قارجى مينيسترلىگى، مەملەكەتتىك كىرىستەر كوميتەتى رەسەيگە وتەتىن شەكارا بەكەتتەرىندە جۇك كولىكتەرىنىڭ كەزەگى تىركەلمەگەنىن مالىمدەدى، دەپ حابارلايدى "ادىرنا" ۇلتتىق پورتالى.
«تەكسەرۋلەر ادەتتەگى رەجيمدە ءجۇرىپ جاتىر»، – دەلىنگەن حابارلامادا.
سونىمەن قاتار ۆەدومستۆو تاسىمالداۋشىلاردىڭ شاعىمىنا سىلتەمە جاساپ، رەسەي اۋماعىندا قازاقستاندىق جۇك كولىكتەرىنە تەكسەرۋلەر كۇشەيگەنىن اتاپ ءوتتى.
«تاسىمالداۋشىلار كىدىرىستەر مەن قوسىمشا شىعىندارعا اكەلەتىن تەكسەرۋلەردىڭ كوبەيگەنىن ايتادى. قازاقستان ءوز كەزەگىندە ەاەو ەرەجەلەرىن ساقتاپ وتىر، وندا تاۋارلاردىڭ ەركىن قوزعالىسى قاراستىرىلعان»، – دەدى كوميتەت وكىلدەرى.
رەسەيدىڭ فەدەرالدىق كەدەن قىزمەتى دە كەزەكتەرگە قاتىسى جوق ەكەنىن مالىمدەدى.
ولاردىڭ ايتۋىنشا، جۇك كولىكتەرىنىڭ جينالۋى قازاقستان اۋماعىنداعى تۇراقتاردا بايقالعان، ال تىكەلەي وتكىزۋ پۋنكتتەرىندە كەزەك تىركەلمەگەن.
بۇعان دەيىن رەسەيلىك باق 18 قىركۇيەكتە قازاقستان مەن رەسەي شەكاراسىندا جۇك كولىكتەرىنىڭ رەكوردتىق كەزەگى پايدا بولعانىن جازعان. ونىڭ سەبەپتەرى رەسمي تۇردە تۇسىندىرىلمەگەن.
ساراپشىلاردىڭ ايتۋىنشا، وعان «كەزدەيسوق تەكسەرۋلەر»، «قىتايدان كەلەتىن سۇر يمپورتپەن كۇرەس» جانە «كونترافاكت ونىمدەرىن انىقتاۋ» ىقپال ەتكەن بولۋى مۇمكىن.
ايتا كەتەيىك، ماۋسىم ايىندا دا شەكارادا وسىنداي ءىرى كەپتەلىس ورىن العان. ول كەزدە قاراپايىم ازاماتتار دا قيىندىققا تاپ بولعان ەدى. بۇعان جازعى تۋريستىك اعىمنىڭ ارتۋى جانە 30 ماۋسىمنان باستاپ رەسەيدىڭ جاڭا كوشى-قون تالاپتارىنىڭ كۇشىنە ەنۋى اسەر ەتكەن.
