2025 جىلى ستاتسيونارلىق دەڭگەيدە پاللياتيۆتىك كومەك كورسەتۋ ءتاريفى ارتتى، سونداي-اق كەپىلدەندىرىلگەن تەگىن مەديتسينالىق كومەك (كتتمك) شەڭبەرىندە ءموبيلدى بريگادالاردى قارجىلاندىرۋ كولەمى ۇلعايتىلدى.
«بۇل شارالار ناۋقاستاردىڭ پاللياتيۆتىك كومەككە قولجەتىمدىلىگىن ارتتىرۋعا، ينفراقۇرىلىمدى نىعايتۋعا جانە قىزمەتتىڭ بارلىق دەڭگەيلەرىندە دامۋىن ىنتالاندىرۋعا مۇمكىندىك بەرەدى»، — دەپ اتاپ ءوتتى دەنساۋلىق ساقتاۋ ءمينيسترى اقمارال ءالنازاروۆا الماتى قالاسىندا وتكەن پاللياتيۆتىك كومەك كورسەتۋ ماسەلەلەرىنە ارنالعان جىل سايىنعى كونفەرەنتسيا قاتىسۋشىلارىنا ارناعان قۇتتىقتاۋ سوزىندە.
قازاقستاندا پاللياتيۆتىك كومەكتى دامىتۋ – دەنساۋلىق ساقتاۋ جۇيەسىنىڭ باسىم باعىتتارىنىڭ ءبىرى.
«جازىلمايتىن دەرتكە شالدىققان ادامدارعا ساپالى پاللياتيۆتىك كومەك ۇيىمداستىرۋ – بۇل جاي عانا مەديتسينالىق مىندەت ەمەس. بۇل – ادامگەرشىلىك، مەيىرىم جانە ادىلەتتىلىك ماسەلەسى. قازىرگى ۋاقىتتا پاللياتيۆتىك كومەك كورسەتۋدى ۇيىمداستىرۋدىڭ جاڭا ۇلتتىق ستاندارتتارى ازىرلەنۋدە. ولار تاسىلدەردى بىرىزدەندىرۋگە، قىزمەت ساپاسىن ارتتىرۋعا جانە مۋلتيديستسيپلينارلىق كوماندالاردىڭ ءتيىمدى جۇمىسىن قامتاماسىز ەتۋگە باعىتتالعان. بۇل جۇمىستار ستاتسيونار جاعدايىندا دا، ءۇي جاعدايىندا دا جۇرگىزىلەدى. اسىرەسە، بالالار ءپاللياتيۆىن دامىتۋ – الدا بىزگە ۇلكەن جاۋاپكەرشىلىك جۇكتەيتىن ماڭىزدى باعىت»، – دەدى مينيستر.
2025 جىلعى 1 قاڭتارداعى جاعداي بويىنشا، قازاقستاندا پاللياتيۆتىك توسەك-ورىن سانى نورماتيۆكە جەتكىزىلدى — ءار 100 مىڭ ادامعا 10 توسەك. ەل بويىنشا بارلىعى 2 087 توسەك ورنى ۇيىمداستىرىلعان، ونىڭ ىشىندە 81-ءى بالالارعا ارنالعان.
رەسپۋبليكانىڭ 20 وڭىرىندە 220 ءموبيلدى بريگادا جۇمىس ىستەيدى.
قازىرگى ۋاقىتتا قازاقستاندا 9 دەربەس مەكەمە پاللياتيۆتىك كومەك كورسەتەدى (الماتى، جامبىل، قاراعاندى، پاۆلودار، سولتۇستىك قازاقستان، شىعىس قازاقستان، اباي وبلىستارىندا، سونداي-اق الماتى جانە شىمكەنت قالالارىندا).
پاللياتيۆتىك كومەككە مۇقتاج ناۋقاستاردىڭ اۋرۋ قۇرىلىمى كەڭەيدى:
• ونكولوگيالىق اۋرۋلار — 41%،
• جۇرەك-قانتامىر جۇيەسى اۋرۋلارى — 27%،
• تىنىس الۋ جۇيەسى اۋرۋلارى — 12%،
• جاراقاتتار — 11%،
• تۋبەركۋلەز — 2%.
پاللياتيۆتىك كومەك كورسەتۋ كەزىندە قولدانىلاتىن انەستەتيكتەر مەن دارىلىك زاتتار ءتىزىمى 18 اتاۋعا دەيىن كەڭەيتىلدى.
2025 جىلعا بىرىڭعاي ديستريبيۋتور 318,1 ملن تەڭگە سوماسىنا 9 اتاۋداعى دارىلىك زاتتاردى (2 ملن-نان استام بىرلىك) ساتىپ الدى.
سونىمەن قاتار،قازىرگى زامان تالابىنا ساي كەلتىرۋ ماقساتىندا دەنساۋلىق ساقتاۋ مينيسترلىگى پاللياتيۆتىك كومەك كورسەتۋ ستاندارتىنا وزگەرىستەر ەنگىزۋدى جوسپارلاپ وتىر.
كونفەرەنتسيا قورىتىندىلارى جازىلمايتىن دەرتكە شالدىققان ادامداردىڭ ءومىر ساپاسىن قامتاماسىز ەتەتىن ينتەگراتسيالانعان پاللياتيۆتىك كومەك جۇيەسىن قالىپتاستىرۋ جولىنداعى جاڭا قادام بولماق.
