ۆلاديمير پۋتين 15 قازان كۇنى ماسكەۋدە وتكىزۋدى جوسپارلاعان العاشقى رەسەي-اراب ءسامميتى كەيىنگە شەگەرىلدى. بۇعان اراب مەملەكەتتەرى ليگاسىنا مۇشە ەلدەردىڭ باسىم بولىگى رەسەي تاراپىنىڭ شاقىرۋىن قابىلداماعانى سەبەپ بولدى، دەپ حابارلايدى “ادىرنا” ۇلتتىق پورتالى Bloomberg اگەنتتىگىنە سىلتەمە جاساپ.
بۇل سامميت جىل ىشىندەگى ماڭىزدى سىرتقى ساياسي وقيعالاردىڭ ءبىرى رەتىندە جوسپارلانعان. كرەمل بۇل كەزدەسۋدى رەسەيدىڭ اراب الەمىندەگى ىقپالىن كورسەتۋدىڭ جانە اقش، اسىرەسە دونالد ترامپ اكىمشىلىگىنە، ماسكەۋدىڭ ايماقتاعى قولداۋعا يە ەكەنىن دالەلدەۋدىڭ ءبىر جولى رەتىندە قاراستىرعان.
الايدا 22 شاقىرىلعان ەلدىڭ كوشباسشىلارىنىڭ تەك بىرنەشەۋى عانا قاتىساتىنىن راستاعان. ولاردىڭ قاتارىندا سيريانىڭ جاڭا پرەزيدەنتى احمەد اش-شاراا مەن اراب مەملەكەتتەرى ليگاسىنىڭ باس حاتشىسى احمەد ابۋل گەيت بار. ايماقتاعى نەگىزگى باسشىلار — ساۋد ارابياسىنىڭ تاق مۇراگەرى مۇحاممەد بەن سالمان، ءباا پرەزيدەنتى مۇحاممەد يبن زايد ءال ناحايان جانە مىسىر پرەزيدەنتى ابدەل فاتتاح اس-سيسي — شاقىرۋدى قابىلدامادى.
كرەمل ءسامميتتىڭ كەيىنگە شەگەرىلۋىن گازاداعى جاعدايدى رەتتەۋگە باعىتتالعان "ترامپ جوسپارىنىڭ" جۇزەگە اسا باستاۋىمەن بايلانىستىردى.
Bloomberg دەرەككوزدەرىنىڭ حابارلاۋىنشا، ماسكەۋ بۇل سامميت الداعى ۋاقىتتا مىندەتتى تۇردە وتەدى دەپ ۇمىتتەنىپ وتىر.
