ۇلىتاۋ وبلىسى اكىمى داستان رىسپەكوۆتىڭ توراعالىعىمەن كەزەكتى اپپارات جيىنى ءوتتى. كۇن تارتىبىندەگى ماسەلەلەرگە دەيىن ءوڭىر باسشىسى ۇلىتاۋ وبلىسى بويىنشا مەملەكەتتىك كىرىستەر دەپارتامەنتىنىڭ باسشىسىن تانىستىردى.
كۇن تارتىبىندە وتاندىق وندىرۋشىلەردى دامىتۋ مەن قولداۋ شارالارى، كوممۋنالدىق مەنشىك نىساندارىن باسقارۋ جانە مەملەكەتتىك ساتىپ الۋلاردى وتكىزۋ جايىندا ماسەلەلەر قارالدى.
وبلىس اكىمى كاسىپكەرلەرگە جاسالىپ جاتقان مەملەكەتتىك قولداۋ شارالارىنىڭ جوعارى دەڭگەيدە جۇرگىزىلىپ جاتقاندىعىن اتاپ ءوتىپ، ەندىگى كەزەكتە ءونىم ءوندىرۋ ءىسىن العا قويۋ قاجەتتىگىن ەسكەرتتى. بۇل تۇرعىدا ءوڭىر باسشىسى كاسىپورىن اشقىسى كەلەتىن، ءوندىرىسىن كەڭەيتكىسى كەلەتىن كاسىپكەرلەرگە دە كومەك كورسەتۋدى تاپسىردى. ول باعىتتاعى جۇمىستى شيراتۋ ءۇشىن «اتامەكەن» كاسىپكەرلەر پالاتاسىمەن، «ۇلىتاۋ» اكك-مەن بىرلەسكەن تۇردە ءتۇسىندىرۋ جۇمىستارىن كۇشەيتۋ مىندەتىن جۇكتەدى.
سونداي-اق كەڭەستە قۇقىقتىق قۇجاتتارى جوق مۇلىكتەر ماسەلەسى دە كوتەرىلدى. ءوڭىر باسشىسى بۇل قوردالانعان ماسەلەنى كەزەڭ-كەزەڭىمەن شەشۋ ماقساتىندا جەزقازعان قالاسى اكىمىنە جول كارتاسىن دايىنداۋدى تاپسىرسا، جاڭاارقا اۋدانى مەن قاراجال قالاسىنداعى نىسانداردى زاڭداستىرۋ ءۇشىن جەرگىلىكتى اكىمدەرگە الداعى ەكى اپتا ىشىندە ۇسىنىس بەرۋدى جۇكتەدى.
«90-شى جىلدارى وڭىردەگى بىرقاتار نىسان جەكەنىڭ قولىنا ءوتىپ كەتتى، اراسىندا نەگىزسىز بەرىلگەندەرى بولۋى دا مۇمكىن. سوندىقتان بۇل عيماراتتاردى مەملەكەت قاجەتتىلىگىنە قايتارۋدى شۇعىل قولعا الۋىمىز قاجەت. وسى ماسەلە بويىنشا ءتيىستى قۇجات دايىنداپ، ءتىزىم جاساۋدى، اتالعان ماسەلەنى قۇقىق قورعاۋ ورگاندارىمەن بىرلەسىپ پىسىقتاۋدى تاپسىرامىن»،-دەدى ءوڭىر باسشىسى ءوز سوزىندە.
كەڭەستە وبلىس باسشىسى مەملەكەتتىك ساتىپ الۋدىڭ ۋاقىتىلى ءارى ساپالى ورىندالۋى قاجەت ەكەنىن تاعى ءبىر رەت ەسكەرتتى.
قۇرىلىس، اباتتاندىرۋ، كوگالداندىرۋ جانە جولداردى جوندەۋ جۇمىستارىنىڭ كەستەگە ساي ءجۇرۋى كونكۋرستاردىڭ ۋاقىتىلى جۇرگىزىلۋىنە تىكەلەي بايلانىستى ەكەندىگىن العا تارتىپ، تالاپ ورىندالماعان جاعدايدا 9 ايدىڭ ناتيجەسىندە قورىتىندى شىعارىلاتىنىن جەتكىزدى.
