الماتىدا NOMAD Bazaar اتتى ء"بىر اۋىل - ءبىر ءونىم" ء(بابو) جوباسىنىڭ ورتالىق ازياداعى العاشقى تۇراقتى ساۋدا الاڭى اشىلدى. جاڭا دۇكەن كوك بازاردىڭ ورتالىق پاۆيلونىندا ورنالاسقان.
Nomad Bazaar جاي عانا دۇكەن ەمەس، ول اۋىلداعى ءوندىرۋشىنى مەگاپوليس تۇتىنۋشىسىمەن بايلانىستىراتىن پلاتفورما. مۇندا ءبابو جوباسىنا قاتىساتىن قازاقستاندىق قولونەر جانە گاسترونوميالىق برەندتەر جەرگىلىكتى باستامالاردى تۇراقتى بيزنەسكە اينالدىرا وتىرىپ، ءونىم ۇسىنا الادى. 50 م2 ساۋدا نۇكتەسى "بارلىعى ءبىر شاتىر استىندا" ۇستانىمىمەن ورنالاسقان: لوگيستيكا، وراۋ، ساتۋ جانە بۋحگالتەرلىك ەسەپ ورتالىقتاندىرىلعان. بۇل كاسىپكەرلەردىڭ ءونىم ساپاسىنا مۇقيات بولۋىنا مۇمكىندىك بەرمەك. جاڭا الاڭنىڭ ارتىقشىلىعى كوپ. الماتى تۇرعىندارى مەن تۋريستەردىڭ كەڭ اۋديتورياسى وعان قول جەتكىزە الادى، كاسىبي ماركەتينگپەن سۇيەمەلدەنەدى. تۇتىنۋشىلىق سۇرانىستى تالداپ، ءونىمدى وتكىزۋ اۋقىمىن ارتتىراتىن ونلاين - ساتىلىم بار.
ء"بىر اۋىل - ءبىر ءونىم" جوباسى جاپونيانىڭ حالىقارالىق ىنتىماقتاستىق اگەنتتىگىنىڭ (JICA) قولداۋىمەن، ۇلتتىق ەكونوميكا مينيسترلىگىنىڭ باستاماسىمەن، "اتامەكەن" پالاتاسىمەن بىرلەسىپ ىسكە اسىرىلۋدا. ونىڭ ماقساتى — اۋىلداعى كاسىپكەرلىكتى دامىتۋ، قازاقستان وڭىرلەرىنىڭ مادەني ەرەكشەلىگىن كورسەتەتىن بىرەگەي ونىمدەردى ىلگەرىلەتۋ. 2025 جىلى جوبانىڭ برەند-كوميتەتتەرى 60 جەڭىمپازدى تاڭداپ العان بولاتىن. ەندى ولاردىڭ ءونىمى ايماقتىڭ ەرەكشە ءونىمى رەتىندە وزىق كاسىپكەرلىك سيمۆولىنا اينالىپ وتىر. Nomad Bazaar-ءدىڭ اشىلۋى وسى برەندتەردىڭ ورنىقتى ماركەتينگى مەن ساتۋ جۇيەسىن قالىپتاستىرۋداعى قيسىندى قادام بولدى.
جوبا قازىردىڭ وزىندە حالىقارالىق دەڭگەيدە تانىلىپ وتىر. FOODEX Japan كورمەسىندە قازاقستاندىق وندىرۋشىلەردىڭ ءونىمى جوعارى باعالانعان. ال "جانتاق" بالى Honey of the Year بايقاۋىندا ۇزدىك ۇشتىككە ەندى. قازاقستاندىق ىرىمشىك جاساۋشىلار — وتكەن جىلدارداعى جەڭىمپاز. فرانتسياداعى بەدەلدى Mondial du Fromage 2025 بايقاۋىندا التى مەدال جەڭىپ العان.
الداعى ايلاردا ءبابو قاتىسۋشىلارى ءۇشىن ەكسپورتتىق قۋاتتى ارتتىرۋعا ارنالعان تاماق ونەركاسىبى، ستاندارتتاۋ، بۋىپ-ءتۇيۋ جانە ماركەتينگتىك وقىتۋ سەمينارلارى ۇيىمداستىرىلادى.
الماتىدا Nomad Bazaar-دىڭ اشىلۋى ء"بىر اۋىل - ءبىر ءونىم" جوباسىنىڭ جەرگىلىكتى باستامادان وڭىرلەردىڭ تۇراقتى دامۋىنا الىپ كەلگەن Made in Kazakhstan مىقتى برەندىن قالىپتاستىرۋداعى جاڭا دەڭگەيگە ءوتۋدى بىلدىرەدى.
