رەسەيدە تانىمال ءانشى اللا پۋگاچەۆانىڭ مەملەكەتتىك زەينەتاقىسىن توقتاتۋ تۋرالى باستاما قوعامدا قىزۋ تالقىلانىپ جاتىر، دەپ حابارلايدى "ادىرنا" ۇلتتىق پورتالى.
بۇل ۇسىنىستى “حالىق شاقىرۋى” قوزعالىسىنىڭ جەتەكشىسى سەرگەي زايتسەۆ كوتەرگەن. ول پۋگاچەۆانى «ەلدەن كەتىپ، رەسەي مۇددەسىنە قارسى شىققان تۇلعا» دەپ اتاپ، مۇنداي ادامداردىڭ مەملەكەتتەن قارجىلاي كومەك الۋعا قۇقىعى جوق ەكەنىن ايتتى.
“رەسەيدى مويىندامايتىن ءارى وعان قارسى شىعاتىن ادامدار نەگە مەملەكەت ەسەبىنەن ءومىر ءسۇرۋى كەرەك؟” - دەدى زايتسەۆ.
76 جاستاعى اللا پۋگاچەۆا شەتەلدە تۇرىپ جاتقانىنا قاراماستان، رەسەيدەن زەينەتاقى الىپ كەلەدى. تولەمدەر ونىڭ بانك كارتاسىنا تۇراقتى تۇردە ءتۇسىپ وتىرادى، ال ەل ىشىندەگى كەيبىر قارجىلىق ماسەلەلەرىن سەنىمدى وكىلدەرى ارقىلى شەشەدى.
الايدا رەسەي زاڭناماسى بويىنشا، ازاماتتى زەينەتاقىدان ايىرۋ ءۇشىن تۇرعىلىقتى مەكەنجايىن وزگەرتۋ، “شەتەلدىك اگەنت” دەپ تانىلۋ نەمەسە قىلمىستىق ءىس قوزعالۋى نەگىز بولا المايدى.
بۇل جاعداي ەلدە مادەنيەت قايراتكەرلەرىنىڭ ساياسي ۇستانىمدارى مەن مەملەكەتتەن الاتىن الەۋمەتتىك تولەمدەر اراسىنداعى شەكارا تۋرالى پىكىرتالاس تۋدىردى.
