مەكسيكانىڭ ۋرۋاپان قالاسىنىڭ مەرى كارلوس مانسونى قاستاندىقپەن ءولتىرىپ كەتتى. ول ەلدە ەسىرتكى ساۋداسىنا قارسى قاتاڭ شارالار قابىلداۋدى قولداپ كەلگەن، دەپ حابارلايدى “ادىرنا”.
The New York Times باسىلىمىنىڭ جازۋىنشا، قايعىلى وقيعا 1-نەن 2-شى قاراشاعا قاراعان ءتۇنى – مەكسيكاداعى ۇلتتىق مەرەكە، ولىلەر كۇنى كەزىندە بولعان.
«مەكسيكانىڭ باتىسىندا سەنبى كۇنى بولعان اتىس كەزىندە قىلمىسپەن كۇرەستە قاتاڭ ۇستانىمدى تالاپ ەتىپ، پرەزيدەنت كلاۋديا شەينباۋمنان ناركوساۋدامەن كۇرەسكە قوسىمشا كومەك سۇراعان مەر قازا تاپتى»، – دەلىنگەن حابارلامادا.
بەلگىلى بولعانداي، مەر شام جاعۋ راسىمىنە قاتىسىپ تۇرعان ساتتە وعان شابۋىل جاسالعان.
شەتەلدىك باق مالىمەتىنشە، مانسو فەدەرالدى بيلىكتىڭ ۇيىمداسقان قىلمىسقا قارسى ساياساتتارىن بىرنەشە رەت سىنعا العان جانە سوڭعى ايلاردا ءوزىنىڭ ومىرىنە قاۋىپ ءتونىپ وتىرعانى جايلى بەينەجازبالار جاريالاعان.
ميچواكان شتاتى ءالى دە قۋاتتى ەسىرتكى كارتەلدەرىنىڭ قاقتىعىسى ءجۇرىپ جاتقان ايماقتاردىڭ ءبىرى بولىپ قالا بەرەدى.
الەۋمەتتىك جەلىلەردە شابۋىل ورنىنان تۇسىرىلگەن بەينەجازبالار تارالىپ جاتىر.
