اباي وبلىسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ اناسى الميرا نۇرلىبەكوۆا ءوز تۋىسى بەكزات كەمەلوۆانى 1 ميلليون دوللاردى ۇرلادى دەپ ايىپتاپ، سوتقا جۇگىندى، دەپ حابارلايدى "ادىرنا".
تەرگەۋ نۇسقاسىنا سايكەس، نۇرلىبەكوۆا ءوز تۋىسى مەن ونىڭ جۇبايىنا 1 ميلليون دوللاردى ساقتاۋ ءۇشىن بەرگەن. الايدا كەيىن اقشانى قايتارا الماي قالعانىن ايتادى.
مەملەكەتتىك ايىپتاۋشى گۇلميرا ابدراحمانوۆانىڭ سوزىنشە، كەمەلوۆا نۇرلىبەكوۆانىڭ ۇلى قۋاندىق بيشىمباەۆقا قاتىستى قىلمىستىق ىستەن كۇيزەلىسكە تۇسكەنىن پايدالانىپ، ونى الداپ سەندىرگەن.
«كەمەلوۆا انتيكور قىزمەتكەرلەرى مۇلكى مەن قاراجاتىن تاركىلەيدى دەگەن جەلەۋمەن الميرا نۇرلىبەكوۆانى اقشانى وزىنە بەرىپ، جاسىرعان دۇرىس دەپ سەندىرگەن»، — دەدى پروكۋرور.
ايىپتالۋشى بەكزات كەمەلوۆانىڭ قورعاۋشىسى يگور ۆرانچەۆ بۇل ايىپتاۋلارمەن كەلىسپەيدى. ونىڭ ايتۋىنشا، ءىس – وتباسى اراسىنداعى جەكە جانجالدىڭ سالدارى.
«مەنىڭ قورعاۋىمداعى كەمەلوۆا اقشانى يەمدەندى دەگەن مالىمدەمە شىندىققا جاناسپايدى. بۇل – ەكى وتباسى اراسىنداعى داۋ. كەمەلوۆانىڭ جۇبايى، بۇرىنعى سوت-مەديتسينالىق ساراپشى، بيشىمباەۆتار وتباسىنا سالتانات نۇكەنوۆا ىسىندە كومەك كورسەتۋدەن باس تارتقاننان كەيىن وسىنداي جانجال تۋىنداعان»، – دەدى ادۆوكات.
جابىرلەنۋشى تاراپتىڭ مۇددەسىن قورعاۋشى ەرلان گازىمجانوۆ — بۇعان دەيىن قۋاندىق بيشىمباەۆتىڭ ادۆوكاتى بولعان.
ەسكە سالا كەتسەك، بۇرىنعى مينيستر قۋاندىق بيشىمباەۆ جۇبايى سالتانات نۇكەنوۆانى اسا قاتىگەزدىكپەن ولتىرگەنى ءۇشىن 24 جىلعا باس بوستاندىعىنان ايىرىلعان.
2024 جىلدىڭ 26 ماۋسىمىندا اپەللياتسيالىق القا ۇكىمدى وزگەرىسسىز قالدىرعان. قازىرگى ۋاقىتتا ول تۇرمەدە جازاسىن وتەپ جاتىر.
